اقتٶبەدە № 27 مەكتەپ-ليتسەيدٸڭ 10-سىنىبى جابىلىپ قالۋى مٷمكٸن. اتا-انالار قارسىلىق بٸلدٸردٸ, دەپ حابارلايدى قازاقپارات.
اقتٶبە قالاسىنداعى № 27 ورتا مەكتەپ-ليتسەيدٸڭ اتا-انالارى وقۋ جىلى باستالعان كٷنٸ ەكٸمدٸكتٸ جاعالاپ جٷر. سەبەبٸ مەكتەپ ەكٸمشٸلٸگٸ 30 تامىزدا 10-سىنىپتىڭ جابىلاتىنىن حابارلاعان.
«بالام مامىر ايىندا 10-سىنىپقا قالۋ ٷشٸن ارنايى تەست تاپسىردى. بارلىعى 24 وقۋشى ٶتٸپ, وسى وقۋ جىلىندا بٸر سىنىپ اشىلاتىنى بەلگٸلٸ بولدى. ال تامىزدىڭ 26-سىندا قايتا جيناپ, كەيبٸر بالالارعا ۇبت-دان ٶتپەيتٸنٸن باسا ايتقان. سول كەزدە كٶبٸ قۇجاتتارىن الىپ كەتتٸ. ال جاڭا وقۋ جىلى باستالاردا, ياعني, 30 تامىزدا 10-سىنىپتىڭ قازاق توبى بولمايتىنىن حابارلادى. سوندا دا بالالار ساباققا كەلدٸ, بٸراق بوس وتىردى. بٷگٸن بەس ساباق بولسا, تەك دەنە شىنىقتىرۋ مەن ينفورماتيكا ٶتكەن, الدىڭعى ٷش ساباق مۇعالٸمسٸز بوس وتىرعان», - دەيدٸ وقۋشىنىڭ اناسى راۋشان الماحانوۆا.
مەكتەپ ەكٸمشٸلٸگٸ بۇل مەسەلەنٸ ٶزدەرٸ شەشە المايتىنىن, تەك قالالىق بٸلٸم بٶلٸمٸ جاۋاپ بەرەتٸنٸن جەتكٸزدٸ.
«ٶتكەن جىلى 25 وقۋشى 9-سىنىپتى بٸتٸردٸ. «بٸلٸم تۋرالى» زاڭعا سەيكەس 20 وقۋشىدان كەم بولماۋى تيٸس. بٸزدەگٸ وقۋشىلاردىڭ 10-ى كوللەدجگە وقۋعا تٷسٸپ كەتتٸ. نەتيجەسٸندە 16 بالا قالدى. بٸرەۋٸ اۋداننان كەلگەن بولاتىن. التى بالا باسقا مەكتەپكە اۋىستى. بٸرنەشە رەت اتا-انالارعا ەسكەرتۋ بەرٸلدٸ. بٸز ەشتەڭە شەشە المايمىز», - دەيدٸ №27 مەكتەپ-ليتسەي ديرەكتورىنىڭ مٸندەتٸن اتقارۋشى التىنگٷل گالەەۆا.
ال قالالىق بٸلٸم بٶلٸمٸ مەسەلەنٸ شەشۋگە كٸرٸسكەن.
«ەرەجە بويىنشا سىنىپتا 25 وقۋشىدان كەم بولماۋى تيٸس. سوندىقتان 10-سىنىپتى اشۋ مٷمكٸن بولمادى. ەكونوميكالىق جاعىنان دا تيٸمسٸز. شىنىن ايتقاندا وقۋ پروتسەسٸ جٷرٸپ جاتىر. ول قازاق سىنىبىندا قازٸر 11 وقۋشى بار. مەسەلە تولىعىمەن شەشٸلەدٸ. ياعني, ٶزگە بٸلٸم وردالارىنان وقۋشىلاردى سول مەكتەپكە اۋىستىرامىز», - دەدٸ قالالىق بٸلٸم بٶلٸمٸنٸڭ باسشىسى سايان سٷلەيمەنوۆ.
