Ánshi Dimash Qudaibergendi kórýge, onyń mektebi, mýzykalyq kolledji jáne otbasymen tanysýǵa birneshe fanklýb jetekshisi keledi. Týristerdi kútip alý, ornalastyrýǵa Mádeniet jáne sport ministrligi, «Qazaq týrizm» ulttyq kompaniiasy qarjy bóldi, dep habarlaidy QazAqparat tilshisi.
«Qazirgi kezde álemniń 100-den astam memleketinde Dimashtyń fanklýby bar. Fantoptardyń jetekshileri Aqtóbege kelýge usynys aitty. Fanattardyń kelýin, jol shyǵyndaryn Mádeniet jáne sport ministrligi janynan qurylǵan «Qazaq týrizm» ulttyq kompaniiasy men Aqtóbe ákimdigi óz mindetine aldy», - dedi Dimash Qudaibergenniń anasy Sveta Aitbaeva.
Aitap aitqanda, Aqtóbege AQSh, Germaniia, Malaiziia, Japoniia, Polsha, Frantsiia, Indoneziia, Ýkraina, Qytai men Qazaqstandaǵy fan top jetekshileri keledi. Sonymen qatar, Jańa Zellaniia, Finliandiiadaǵy fanattar óz erkimen, óz shyǵyndaryn ótep kelýge ázirlenip, jolǵa shyqty.
«Kelýshiler tek Dimashty emes, «Baqytty bala» jobasy aiasynda án shyrqaityn ónerpazdardy tyńdaýǵa, ózge de talantty balalarmen tanysýǵa nietti. Qazaqtyń ulttyq bolmysyn, mádenieti men tabiǵatyn kórýge qushtar jandar óz usynysyn bergende qonaqjailylyǵymyzdy tanytýǵa kúsh salamyz. Barlyǵyn qushaq jaia qarsy alýǵa daiynbyz. Olarǵa arnaiy baǵdarlama jasaldy. Almaty, Astana, Aqtóbe qalalaryn aralaidy. Úsh qalanyń ákimdigi men «Qazaq týrizm» kompaniiasy birigip, arnaiy marshrýt ázirledi. Aqtóbede qalanyń kórikti jerlerin kóredi. Sonymen qatar, Dimash oqyǵan №32 mektep-gimnaziiaǵa, mýzykalyq kolledjge baryp, ustazy Marat Áitimovtyń sheberlik sabaǵyna qatysady. Bári biledi, daiyndyq júrip jatyr», - dedi Sveta Aitbaeva.
