Aqtóbedegi Qazaq-orys halyqaralyq ýniversitetiniń jumysynda óreskel zań buzýshylyqtar anyqtaldy, dep habarlaidy "Ult aqparat" BǴM baspasóz qyzmetine silteme jasap.
Bilim jáne ǵylym salasyndaǵy sapany qamtamasyz etý komiteti profilaktikalyq baqylaý kezinde ýniversitettiń bilim berý salasyndaǵy zańnama talaptaryn saqtamai otyrǵanyn anyqtady.
Mysaly, oqý orny baqylaý paraǵynyń 46 tarmaǵynyń 32 tarmaǵy boiynsha buzýshylyq jasaǵan. Atap aitqanda, Aqtóbedegi Qazaq-orys halyqaralyq ýniversitetiniń stýdentterine lektsiiany biliktilik talaptaryna sai kelmeitin oqytýshylar oqidy. Mysaly, «Áýe kóligin paidalaný» mamandyǵy boiynsha bazalyq bilimi bar muǵalim «Mektepke deiingi tárbiedegi innovatsiialyq tehnologiialar» jáne «Bastaýysh mektepte tárbie jumysynyń teoriiasy men ádistemesi» pánderinen sabaq beredi. Al dene shynyqtyrý pániniń muǵalimi mýzykalyq ónerdiń teoriiasy men ádistemesi boiynsha sabaqtar júrgizedi.
«Profilaktikalyq baqylaý barysynda sońǵy 5 jylda birde-bir ǵylymi maqalasy joq oqytýshylar Qazaq-orys halyqaralyq ýniversitetinde magistrlik dissertatsiialarǵa ǵylymi jetekshilik etetini anyqtaldy jáne bular buzýshylyqtardyń bir bóligi ǵana», - dep aitty QR BǴM Bilim jáne ǵylym salasyndaǵy sapany qamtamasyz etý komiteti tóraǵasynyń orynbasary Gúljan Jarasova.
Stýdentter men oqytýshylar týraly naqty derekter UBDQ málimetterine sáikes kelmeidi. Derekter bazasynda 335 oqýshy men kóptegen muǵalim týraly aqparat joq.
Onymen qosa, ýniversitet stýdentterdiń oqý júktemesi men olardy qorytyndy attestatsiiadan ótkizý talaptaryn saqtamaidy. Bakalavriat jáne magistratýra stýdentteri akademiialyq kreditterdi tolyq kólemde igermegen.
Stýdentterdiń bilim nátijesi de kóńil kónshitpeidi, olardyń 96%-y shekti deńgeiden óte almady, bul bilim berý qyzmetiniń sapasynyń tómendigin kórsetedi.
Ýniversitet oqý kabinetterimen jáne zerthanalyq bazamen jetkilikti qamtamasyz etilmegen. Keibir kabinetter sanitarlyq talaptarǵa sai kelmeidi.
Ýniversitetke barlyq anyqtalǵan buzýshylyqty joiýǵa ýaqyt berildi. Alaida Aqtóbedegi Qazaq-orys halyqaralyq ýniversiteti kóptegen zańbuzýshylyqty joiyp, bilim sapasyn arttyrýdyń ornyna, tekserý nátijesine shaǵymdanýmen ýaqyt ótkizip jatyr.
Birinshi satydaǵy sottyń sheshimimen komitettiń barlyq ákimshilik aktisi zańdy dep tanyldy, al ýniversitettiń shaǵymy qanaǵattandyrýsyz qaldyryldy.
Ministrlik talapkerlerge, stýdentterge jáne olardyń ata-analaryna joǵary oqý ornyn tańdaý kezinde bilim sapasyna mán berý keregin taǵy da bir márte eskertedi.
