Aqtóbedegi terrorlyq akt kezinde qarýly qaqtyǵysqa qatysyp, birneshe jerinen jaralanǵan Álibek Jetiǵarin búgin baspanaly boldy, dep habarlaidy QazAqparat tilshisi.
2016 jyly Aqtóbe qalasynda terrorlyq akt bolyp, qarýly top birneshe qarý-jaraq dúkeni men áskeri bólimge basyp kirdi. Sol kezde oqiǵa ornyna alǵashqylardyń biri bolyp jetken politsiia qyzmetkeri Álibek Jetiǵarin búgin baspanaly boldy.
«Álibek Jetiǵarin 2014 jyly politsiia qyzmetkeri atanyp, jol-patrýl batalonynda jumys istedi. Ol 2016 jyldyń 5 shilde kúni terroristik akt bolǵan kezde alǵashqylardyń biri bolyp oqiǵa ornyna jetti. Sol kezde oq tiip, aýyr jaralandy. Baýyryna zaqym kelip, oń qolyna oq tidi. Qazirgi kezde oń qoly durys jumys istemeidi. Sondyqtan múgedektik berilgen. QR «Quqyq qorǵaý qyzmeti týraly» Zańy aiasynda qyzmetker 4 ai em ala alady. Al asa aýyr bolsa 9 ai ǵana em qabyldaýǵa ruqsat berilgen. Biz 2 jyl ýaqyt berdik, biraq densaýlyǵyn qalpyna keltirý múmkin bolmady. Sondyqtan 2018 jyldyń qarasha aiynda politsiia departamentinen jumystan shyǵaryldy. Biraq, ony men eńbek demalysynda júrgen kezde habarlap, aitpaǵan. Búgingi isimizdi aitqyzbai-aq isteýimiz kerek edi. Sondyqtan jumystan shyǵarý týraly sheshimge qol qoiǵan eki qyzmetkerdiń ózi jumystan ketip, birneshe basshy jazalandy. Álibekke 2 jyldyq jumysta 6 ret syiaqy taǵaiyndaldy, onyń úsheýi QR IIM buiryǵymen berildi. Eshqandai eskertý almaǵan politsiia qyzmetkeri sol oqiǵadan soń «Erligi úshin» medalimen marapattaldy. Qazirgi kezde Álibekke 2 bólmeli qyzmettik páter berilip otyr. Politsiia qyzmetkerleriniń bári 1 kúndik jalaqysyn aýdardy. Bul - 7,5 million teńge. Sonymen qatar, politsiia departamenti tóleýi tiis 1,5 million teńgeni aýdardy. «Darý» ońaltý ortalyǵymen arnaiy baǵdarlama jasalyp, em qabyldaidy», - dedi Aqtóbe oblystyq politsiia departamentiniń bastyǵy Mahambet Abisatov.
Jumyssyz qalǵan burynǵy politsiia qyzmetkeri aldaǵy ýaqytta jalaqysynyń 50 paiyzyn alyp otyrady. Sonymen qatar, politsiia departamentiniń bastyǵy Aqtóbe qalalyq sal aýrýyna shaldyqqandardy qoldaý ortalyǵynyń tóraiymy Quralai Baimenovamen habarlasyp, jańa is bastaýǵa keńes berdi. Tipti biznes ashý múmkindigi bar ekenin jasyrmady.
«Biz de kómek kórsetemiz. Árbir politsiia qyzmetkeri erlik umytylmaitynyn bilýi kerek. Álibektiń erligin eshkim umytpaý tiis. Alǵys aitamyz. Ol bizdiń janymyzda bolady. Onyń sýreti politsiia departamentinde ilýli tur, bári úlgi tutady», - dedi Mahambet Abisatov.
Aita keteiik, Álibek Jetiǵarin quqyqtaný mamandyǵy boiynsha bilim alyp, keiin Otan aldyndaǵy boryshyn ótegen. Týǵan jerge qaita oralǵan soń politsiia qyzmetkeri atandy.
