Muǵaljar aýdanynda gaz ballon jarylyp, bir bala kóz jumdy. Qazir arnaiy komissiia qurylyp, shyǵyndy eseptep jatyr, dep habarlaidy "Ult aqparat".
24 aqpan kúni saǵat 23:51-de Aqtóbe oblysy TJD kezekshi-dispetcherlik qyzmetine Muǵaljar aýyly, Zaýyt kóshesindegi úide gaz ballon jarylyp, artynan órt shyqqany týraly habarlama tústi. Muǵaljar aýylynyń órt sóndirý bólimi, politsiia jáne jedel járdem brigadasynan 13 adam jáne 4 tehnika oqiǵa ornyna dereý jetti. Búgin oblystyq tótenshe jaǵdailar departamenti oqiǵanyń mán-jaiyn túsindirdi.
«Órt sóndirý qyzmeti Embi qalasynan bardy. Eki aradaǵy qashyqtyq 37 shaqyrym. Órt sóndirý qyzmeti barǵan kezde úidiń eki qabyrǵasy qulaǵany belgili boldy. Oqiǵa ornynda kúiik shalǵan eki adam qutqaryldy. Mamandar balanyń múrdesin alyp shyqty. Kórshileriniń aitýynsha, túnde 50 l gaz ballon úige kirgizilgen. Jarylyp, keiin arty órtke ulasqan», - dedi Aqtóbe oblystyq tótenshe jaǵdailar departamentiniń bastyǵy Marǵulan Amanbaev.
Qazir aman qalǵan úi iesi men ornyń balasy jansaqtaý bóliminde jatyr, al áieli din aman. Ol aýyldaǵy týma-týystarynyń úiinde.
«Úi iesiniń denesindegi kúiik 65-70 paiyzdy qurap otyr. Sonymen birge 1998 jyly týǵan balanyń qoly kúigen. Kólemi 20% boldy. Jedel járdemmen aýdandyq aýrýhanaǵa tústi. Qazirgi kezde 53 jastaǵy otaǵasynyń jaǵdaiy asa aýyr. Al balanyń jaǵdaiy aýyr. Ekeýi de jansaqtaý bóliminde jatyr. Jaǵdaiy birqalypty bolǵan kezde sanaviatsiiamen oblys ortalyǵyna jetkiziledi», - dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
Muǵaljar aýdanyna qarasty Muǵaljar aýylynda 330 úi bar. Onda 2 myńǵa jýyq adam turady. Munda gaz qubyry tartylmaǵan. Ázirge tek jobalyq-smetalyq qujat daiyndalyp jatyr.
«Jedel komissiia quryldy. Quramynda tótenshe jaǵdailar qyzmeti, politsiia, aýdan ákimdiginiń ókili men depýtattar bar. Úi jaramsyz kúige túsken. Aýylda bos turǵan 2-3 úi bar eken. Eń jaramdysyn biýdjetten tys qarjyǵa satyp alatyn bolamyz. Úige qajetti turmystyq tehnika iri óndiris oryndary, kásipkerlerdiń qoldaýymen alynady. Sonymen birge ómirlik qiyn jaǵdaiǵa tap bolǵan otbasyǵa kómek kórsetetin komissiia otyrysy ótedi. Biýdjetten de qarjy bólinedi. Jerleý rásimine kómek beriledi», - dedi oblys ákiminiń birinshi orynbasary Nurjaýǵan Qalaýov.
