Aqtóbede dárigerler PTR synama alý kezinde sanitarlyq talapty saqtamady, dep habarlaidy "Ult aqparat".
Aqtóbede shetelden kelgender dárigerlerdiń jumysyna narazylyq bildirip, PTR synama alý sátin áleýmettik jelige jariialap jiberdi.
Onda bir tereze arqyly synama tapsyrǵan adamdar araqashyqtyqty saqtamaǵan, al dáriger synama alý erejesin eskermedi.
«Alǵash kezde biz bul jaǵdai Aqtóbede emes dep aqparat berdik. Óitkeni áýejaidan suraǵanda «bizde joq» dep aitty. Videony zerttei kele oqiǵanyń A.Dosjanova atyndaǵy jataqhanada ornalasqan karatin statsionarynda bolǵanyn anyqtadyq. Jolaýshylar Túrkiiadan kelgen. Birqatar buzýshylyq anyqtaldy. Meditsina qyzmetkerinde qorǵanysh quraly bolmady, material alý tehnikasy buzylǵan. Adamdar áleýmettik araqashyqtyqty saqtamaǵan. Statsionardyń jaýapty aǵa dárigeri tártiptik jazaǵa tartyldy. Oǵan eskertý berildi», - dedi oblystyq densaýlyq saqtaý basqarmasy basshysynyń mindetin atqarýshy Bekbolat Izbasarov.
Aita keteiik, bas sanitar dárigerdiń sońǵy qaýlysyna sáikes shetelden kelgender karantinge jatqyzylyp jatyr. Barlyǵy 495 PTR test alyndy. Ekeýinen koronavirýs infektsiiasy anyqtaldy. Bireýi - Túrkistan oblysynyń turǵyny. Ol Mártók aýdanyndaǵy aýrýhanada em alyp jatyr. Al ekinshisi - Aqtóbe qalasynyń turǵyny. Ol úi karantininde. Ekeýi de Reseiden kelgen.
«Oblysta jaǵdai turaqty. Sońǵy táýlikte eshkimnen virýs anyqtalmady. Barlyǵy 3257 adam virýs juqtyrsa, onyń 98 paiyzdan astamy jazyldy. Infektsiialyq statsionarda 37 naýqas em qabyldap jatyr. Onyń tórteýi jansaqtaý bóliminde. Ókpeni jasandy jeldetý apparatyna qosylǵan eshkim joq. Balalar din aman», - dedi Bekbolat Izbasarov.
