Sybailas jemqorlyqqa qarsy is-qimyl agenttigi fermerlik sharýashylyqty qate eseptelgen qosymsha keden salyǵynan qorǵap qaldy, dep habarlaidy "Ult aqparat" agenttiktiń baspasóz qyzmetine silteme jasap.
Agenttiktiń habarlaýynsha, «Green Capital Kazakhstan» kompaniiasy jańa jylyjai tehnologiiasyn qoldana otyryp, Aqtóbe oblysynda kókónis ósiredi. Memleket basshysy Qasym-Jomart Toqaev biyl mamyr aiynda kásiporynnyń jumysymen tanysqanda firma direktory Dirk Aleven qyzanaqtyń jyl saiynǵy ónimi shamamen 3 myń tonna bolatynyn málimdegen.
«Ár apta saiyn biz 100 tonnadan jinaimyz. Negizinen 80 paiyzy Reseige eksportqa ketedi. Qazir bizde 90 adam jumys isteidi. Jylyjai bes gektarda ornalasqan. Biz taǵy 5-eýin salǵanda qyzmetkerler sany 150-160 adamdy quraidy», - dep Dirk Aleven aitqan bolatyn.
Biznesmen qazaqstandyq BAQ-qa bergen suhbatynda jylyjaidyń qurylysyna ruqsat alýǵa 100 000 evro (500 mln teńge) jumsaǵanyn atap ótti. Alaida, is munymen bitpepti. Niderlandtyq investor elge túrli jabdyqtar ákelýdi sheshedi. Osyǵan kelgende Memlekettik kiris komitetiniń keden organdary jospardan tys tekserý uiymdastyryp, tehnikany qate jiktegeni úshin Green Capital Kazakhstan-ǵa qazynagerler 350 mln teńge qosymsha baj salyǵyn salǵan. Firma ókilderiniń aitýynsha, bul somanyń qaidan paida bolǵanyn eshkim naqty túsindirip bere almapty.
Aqyry, investorlar óz múddesin qorǵaý úshin Sybailas jemqorlyqqa qarsy is-qimyl agenttigine, naqtyraq aitqanda, «Protecting business and investments» jobalyq keńsesine júgingen.
«Árine, biz mundai qosymsha esepteýlermen kelispei, jobalyq keńse men oblystyq ákimdikke júgindik. Tek osydan keiin ǵana bári ózgere bastady», - deidi «Green Capital Kazakhstan LLP» JShS tehnikalyq direktory Erlan Jańabergenov.
Agenttik aralaspaǵanda kompaniiany 1 mln dollarlyq shyǵyn bankrot etip, sol arqyly Aqtóbe oblysyn 240 jumys ornynan aiyrar edi
«Tekserý qorytyndysy boiynsha qate jiktegeni úshin atalǵan kásiporynǵa 350 mln teńgeden astam qosymsha keden esepteýlerin kórsetken. Bul kompaniia men investitsiialar jónindegi komitet arasyndaǵy keden salyǵyn tóleýden bosatý túrindegi investitsiialyq jeńildik berilgen kelisim-shartqa qaramastan bolǵan», - dedi Sybailas jemqorlyqqa qarsy is-qimyl Agenttigi tóraǵasynyń orynbasary Shyńǵys Qabdýla.
Nátijesinde, QR Qarjy ministrliginiń appeliatsiialyq komissiiasy investor men kedenshiler arasyndaǵy daýdy qarastyrdy. Aiyppul keden salymdary tek Sybailas jemqorlyqqa qarsy qyzmet aralasqannan keiin ǵana toqtatylyp otyr.
