Aqtóbe prokýratýrasy kóleńkeli ekonomikany kásip etken kompaniialardy anyqtady, dep habarlaidy "Ult aqparat".
2018 jyly oblysta Qylmystyq Kodekstiń «Jumysty is júzinde oryndaýsyz, quqyqtyq qyzmet kórsetýlersiz, taýarlardy jóneltýsiz shot faktýra jazý áreketterin jasaý» baby boiynsha 10 is qozǵalǵan bolatyn. Biyl jyl basynan beri 2 qylmystyq is tirkelip otyr. Al salyqtan jaltarǵan 4 is bar.
«Óńirde «bir kúndik firmalardy» jalǵan tulǵalardyń atyna tirkeý tájiribesi jalǵasýda. Mysalǵa Resei Federatsiiasynyń eki azamaty Kóshi-qon zańnamasyn buzyp, biznes–immigrant vizasyn almai, 5 kompaniiany zańsyz tirkegen jáne sol arqyly 1,5 mlrd teńge aqshany qolma-qol aýdaryp alǵan. Bul derek boiynsha oblys prokýratýrasy Qylmystyq kodekstiń 216-baby boiynsha sotqa deiingi tergep-tekserýdi bastady», - dep habarlady oblystyq prokýratýranyń baspasóz qyzmeti.
Aita keteiik, oblys prokýratýrasynyń bastamasymen Ekonomikalyq tergep-tekserý departamentine 10 kompaniianyń basshysyna qatysty sotqa deiingi tergep-tekserý bastaldy. Qazirgi kezde kelisimsharttardy jaramsyz dep taný týraly 35 talap aryz sotqa berilip, qanaǵattandyryldy. Memlekettik kirister departamentine tapsyrma berilip, salyqtyq tekserýler júrgizildi. Nátijeleri «bir kúndik firmalarǵa» 6,1 mlrd teńge qosymsha salyq esepteldi.
