Aqtóbede sýitsid jasaǵan erli-zaiyptyǵa qatysty jantúrshigerlik derekter anyqtaldy. Sóitsek, búldirshindi ógei sheshesi men ákesi qarańǵy bólmede qamap ustap, sabaǵan. Birinshi synypta oqityn Kristinaǵa týǵan ákesi de arasha túspei, kerisinshe áieliniń mundai jaýyzdyǵyn jasyrmaq bolǵan. Áiteýir, kórshileriniń arqasynda bala aman qaldy. Qazir basynan aýyr jaralanǵan Kristina aýrýhanada jatyr. Bul týraly "KTK" telearnasy habarlady.
"7 jasar Kristinanyń denesi it talaǵandai. Kógermegen jeri qalmaǵan. Qos janary qantalap, beti bileýlenip isip ketken. Bul ózge emes, bir shańyraqta turyp jatqan ógei shesheniń kórsetken qorlyǵy. Adýyndy áiel balany aiaýsyz uryp-soǵyp, qarańǵy bólmege qamap qoiatyn bolǵan", - deidi telearna tilshisi.
Oqýshy Kristina Shýster endigi baqilyq bolyp ketken áke-sheshesinen qatty qorqatynyn aitqan. "Áke-sheshemnen qorqamyn. Olar meni urady. Olardan qutylǵanyma qýanamyn. Ógei anam "sabaǵanymdy eshkimge aitpa, aitsań aiamaimyn" dedi. Men endi úiime qaityp barǵym kelmeidi", - deidi ol.
Únemi kúlip júretin Kristina sońǵy bir aida aýladan kórinbei ketken soń kórshileri alańdai bastaǵan eken. Al ógei sheshesi únemi aýyryp jatyr dep jaýap beretin bolǵan. Kúdikteri seiilmegen kórshiler aqyry tártip saqshysyna habarlapty.
"Aýlaǵa shyǵyp oinaityn edi, sońǵy kezde múldem shyqpaityn boldy. Sabaqtan qaiyp kele jatqanda ǵana baiqap qalamyz. Biraq búgejektep, burynǵydai sóilemeidi", - deidi kórshisi Aleksandra Bevzenko.
Sóitip, shaqyrtýmen kelgen tártip saqshylary taiaqtan ábden álsirep, shalajansar bolyp jatqan Kristinany páterinen taýyp alǵan.
"Qyzdy úiinde jazalap jatyr degen habar keldi. Sol boiynsha qyzmettik mindetimizdi atqardyq. Surastyryp tekserý barysynda qyzdy úidiń ishinen, shkaftyń ishinen shyǵaryp aldyq", - deidi ýchaskelik inspektor Qazybek Adaibaev. (Derekkóz: KTK)
Osydan keiin qyzdyń ákesi Vladimir Shýster men ógei sheshesi Ásel Dúisenbaevanyń ústinen qylmystyq is qozǵalǵan. Qaladan shyqpaý týraly qolhat alynypty. Al keshe, qyzyn sabap tastady dep aiyptalǵan erli-zaiypty munaradan sekirip ketip, alǵan dene jaraqattarynan oqiǵa ornynda qaza tapqan edi.
