Konstitýtsiia kúni Aqtóbe qalasynda eki mektep paidalanýǵa berildi, dep habarlaidy "Ult aqparat".
Aqtóbe qalasyndaǵy Qyzyljar aýylynda Muqaǵali Maqataev atyndaǵy orta mektep ashyldy. Mekteptiń ashylýyna oblys jáne qala basshylyǵy, aýyl turǵyndary, oqýshylar jinaldy.
«Eldiń bolashaǵy, damýy balalarǵa bailanysty ekenin bári biledi. Balalarymyz, jastarymyz qazirgi zaman talabyna sai bilim alýy kerek. Sol tapsyrmany oryndaý maqsatynda jumys isteimiz. Qazir 26 mekteptiń qurylysy júrip jatyr. Onyń 15-i biyl paidalanýǵa berilse, 9-y Bilim kúnine deiin iske qosylady. Aita ketetin bir jait, árbir ata-ana balanyń aldyndaǵy boryshyn umytpaýy kerek. Ustazdar da bala tárbiesine úlken úles qosady», - dedi oblys ákimi Berdibek Saparbaev.
Muqaǵali Maqataev atyndaǵy orta mektep 300 balaǵa arnalǵan. Munda múgedek balalar úshin lift jumys isteidi. Sonymen qatar 200 adamǵa arnalǵan májilis zaly, tolyq jabdyqtalǵan sport zaly men pándik kabinetter bar. Ashana 100 orynǵa shaqtalǵan. Aqtóbe qalalyq bilim bóliminiń basshysy Aisulý Jaqsybevanyń aitýynsha, mektep ashanasynda elektrondy karta paidalanylady.
«Aqtóbe qalasynda úsh aýysymdy mektep máselesi sheshildi. Jańa oqý jylynda 7 mektep ashylyp otyr. Ári birneshe mektepke qosymsha ǵimarat salynýda», - dedi A. Jaqsybaeva.
Aita keteiik, búgin sondai-aq Jańaqonys aýylynda Sábit Dónentaev atyndaǵy orta mektep ashyldy. 300 balaǵa arnalǵan mektep zamanaýi úlgide salynǵan.
