Aqtóbe oblysynda politsiia qyzmetkerleri men pedagogtar vaktsina ala bastady, dep habarlaidy "Ult aqparat".
Aqtóbede meditsina qyzmetkerlerimen birge muǵalimder de vaktsina qabyldai bastady. Búgin oblystyq bilim basqarmasynyń basshysy Nurlan Batyrhan ekpe saldyrdy.
«Aldymen meditsina salasynyń qyzmetkerleri qabyldady. Keri áseri bolmady, báriniń jaǵdaiy jaqsy. Kezek bizge keldi. Men ózim birinshi bolyp vaktsina qabyldadym. Densaýlyǵym jaqsy, alǵashqy sátte vaktsinanyń jaǵymsyz áseri baiqalmady. Bir eskere keterlik jait, eshkimdi májbúrlemeimiz. Áriptesterimniń arasynda bas tartqandar bolmady», - dedi Nurlan Batyrhan.
Aita keteiik, Aqtóbe oblysy boiynsha barlyǵy 25 orynda vaktsina salynýda. Ekpe júrgizetin medtsina qyzmetkerleri aldyn ala biliktiligin arttyrdy.
«№1 Aqtóbe qalalyq emhanasynda 250 meditsina qyzmetkeri ekpe qabyldady. Al búgin ekinshi kezeńi bastaldy. Aq halattylarmen birge muǵalimder jáne politsiia qyzmetkerleri keldi. Bizdiń aýmaqta 13 myń adam bar. Ázirge eshkim bas tartyp jatqan joq. Bári «Spýtnik V» vaktsinasyn alady», - immýnolog-dáriger Nurgúl Bisenǵalieva.
