Aqtóbede ishimdik iship, daý-janjal týyndaǵan kezde biri ekinshisine pyshaq suǵyp alǵan. Kúdikti ustalyp, qamaldy, dep habarlaidy QazAqparat.
Aqtóbe qalalyq politsiia bóliminiń jedel basqarý ortalyǵyna er adam qońyraý shalyp, Kýtýev kóshesinde ornalasqan úide jalǵyz turatyn týysynyń denesin tapqanyn habarlady.
«Oqiǵa ornyna barǵan jedel-tergeý toby shamamen 45 jastaǵy adamnyń denesin tapty. Onyń keýdesinde pyshaq jaraqaty bolǵan. Politsiia qyzmetkerleriniń jedel izdestirý sharalarynyń nátijesinde 44 jastaǵy er adam ustaldy. Ol 22 tamyzda jábirlenýshiniń úiinde ishimdik ishken. Keiin ekeýi sózge kelip, pyshaq suǵyp alǵan. Jinalǵan dáleldemelerdiń jiyntyǵy negizinde qylmystyq is qozǵalyp, kúdikti qamaldy», - dedi oblystyq PD baspasóz qyzmetiniń jetekshisi Erbolat Sarqulov.
Qazir Qylmystyq kodekstiń «Adam óltirý» baby boiynsha sotqa deiingi tergep-tekserý júrgizilip jatyr. Ózge málimetter tergeýge bailanysty jariia etilmeidi.
