Aqtóbede terroristik akt kezinde kóz jumǵan politsiia qyzmetkerleriniń otbasyna qurmet kórsetildi, dep habarlaidy QazAqparat.
El táýelsizdiginiń 30 jyldyǵy qarsańynda Aqtóbe oblystyq politsiia departamenti bastyǵynyń mindetin atqarýshy Qanat Áliev qaza tapqan politsiia qyzmetkeri Aidos Boranbaevtyń otbasyna bardy. Áriptesiniń balalary men áieline qamqorlyq tanytý boryshy sanaityn quqyq qorǵaýshylar olarǵa materialdyq kómek kórsetý úshin arnaiy qor quryp qoiǵan.
«Mereke kúnderi biz qaza tapqan qyzmetkerlerimiz, batyrlarymyzdyń otbasyna baryp, jaǵdaiyn bilemiz. Bul joly Aidos Boranbaevtyń shańyraǵyna kelip, qyzymen, jubaiymen sóilestik, eske aldyq. Arada 10 jyldan astam ýaqyt ótkende balalary ósip, boijetken. Qyzy turmysqa shyqqan. Bul adamnyń kóńilin jailandyratyn qýanyshty habar», - dedi Aqtóbe oblystyq politsiia departamenti bastyǵynyń mindetin atqarýshy Qanat Áliev.
Aita keteiik, Aidos Boranbaev 2011 jyly terroristik akt kezinde kóz jumdy. Sol kúni «Mitsubishi Delica» avtokóligimen júrgen belgisiz adamdar qyzmettik kóliktegi politseilerge oq jaýdyryp, oqiǵa ornynan qashyp ketken. Politsiia aǵa serjanty Aidos Boranbaev pen politsiia serjanty N.Alpysbai alǵan oq jaraqatynan oqiǵa ornynda kóz jumdy. Qyzmettik jáne áskeri boryshyn úlgili atqarǵany, zańdylyq pen quqyqtyq tártipti qamtamasyz etý kezinde kórsetken erligi men janqiiarlyǵy úshin Temir aýdany IIB patrýldik politsiia tobynyń politsiia aǵa serjanty Aidos Sartaiuly Boranbaev III dárejeli «Aibyn» ordenimen marapattalǵan bolatyn.
