Aqtóbede politsiia qyzmetkerleri jedel ustaý sharasy ótkizip, jeńil kólikti toqtatty. Kólik ishinen birneshe qarý-jaraq tárkilendi, dep habarlaidy QazAqparat.
Oqiǵa 21 qarasha kúni saǵat 00.42-de boldy. Politsiia qyzmetkerleri alǵan aqparat boiynsha jedel is-sharalar ótkizý kezinde Jańaqonys eldimekeni mańynda reseilik eseptegi «VAZ-2199» avtokóligin toqtatty. 18 jastaǵy júrgizýshiniń janynda 25 jastaǵy eki jolaýshy bolǵan.
«Avtokólikti tekserý kezinde politsiia qyzmetkerleri «IJ» markaly eki uńǵyly sholaq ańshy myltyǵyn jáne «IJ» markaly eki tegis uńǵyly myltyqty, 16 kalibrli 6 patron men 2 pyshaqty tárkiledi. Sonymen qatar júrgizýshiniń esirtkilik masań kúide bolǵany anyqtaldy. Avtokólik arnaiy turaqqa qoiyldy», - dedi oblystyq PD baspasóz qyzmetiniń jetekshisi Erbolat Sarqulov.
Aita keteiik, osy derek boiynsha Qylmystyq kodekstiń «Qarýdy, oq-dárilerdi zańsyz satyp alý, berý, ótkizý, saqtaý, tasymaldaý nemese alyp júrý» baby boiynsha sotqa deiingi tergeý bastaldy. Politseiler qarý-jaraqty ne úshin janynda ustap júrgenin anyqtaý úshin tergeý júrgizi jatyr. Osy baptyń sanktsiiasy bes myń ailyq eseptik kórsetkishke deiingi mólsherde aiyppul salý ne sol mólsherde túzeý jumystaryna ne bes jylǵa deiingi merzimge bas bostandyǵyn shekteý ne sol merzimge bas bostandyǵynan aiyrý jazasyn kózdeidi.
