Aqtóbede ánshi Dimash Qudaibergenge arnalǵan mýzei kesheni nemese onyń esimimen bailanysty týristik nysan ashyla ma? Oblys ákimi Ońdasyn Orazalinge Ortalyq kommýnikatsiialar qyzmetinde ótken brifingide osyndai suraq qoiyldy, dep habarlaidy QazAqparat.
«Shynymen de bizdiń qalanyń sáýlettik kelbetin Dimash Qudaibergenovpen bailanystyrý josparymyzda bar. Ol – búkil Qazaqstannyń maqtanyshy. Bul adam óz talantymen búkil eldiń, sonyń ishinde bizdiń óńirdiń atyn shyǵaryp júr. Biraq onyń kommertsiialyq jaǵy, uiymdastyrý jumystary bar ekenin túsinetin shyǵarsyz. Qazir onyń ókilderimen osy másele boiynsha kelissózder júrgizip jatyrmyz. Shynymen de, sanitarlyq-epidemiologiialyq shekteýler alynǵannan keiin qalamyzdyń týristerge eń bir tartymdy orny Dimashpen bailanysty bolǵanyn qalaimyz», - dedi oblys ákimi.
Sondai-aq, ol Dimashtyń esimimen bailanysty abattandyrylatyn birneshe oryn tańdap alynǵanyn atady.
«Onyń ishinde Dimashtyń úii de bar. Bul jerde ánshiniń óz qalaýy men erkine de kóp dúnie bailanysty. Bir jaǵynan, sanitarlyq-epidemiologiialyq shekteýlerge qaramastan, osymen úshinshi ret «Baqytty bala» degen Dimashtyń atymen bailanysty festival ótkizip otyrmyz. Ol festivalge ylǵi ózi qatysyp keledi.
Iaǵni, jospar bar. Meniń oiymsha, biz belgili bir kelisimge kelgen soń, bul jospardy iske asyramyz», - dedi Ońdasyn Orazalin.
