Aqtóbe oblysynyń Hromtaý aýdanyndaǵy Tassai aýyly mańynan artilleriia snariady tabylyp, joiyldy, dep habarlaidy QazAqparat.
Tassai aýylynyń turǵyny Hromtaý aýdanynyń politsiia bólimine habarlasyp, jaqyn jerden artilleriia snariadyna uqsas tot basqan metall zat tabylǵanyn aitty. Aýyl turǵyny ony óziniń úiiniń aýlasyna súirep aparǵan.
«Politsiia qyzmetkerleri artilleriia snariadyn tárkilep, joidy. Atalǵan fakti boiynsha Qylmystyq kodekstiń «Qarýdy, oq-dárilerdi zańsyz ótkizý, saqtaý, tasymaldaý nemese alyp júrý» baby boiynsha tergeý áreketteri júrgizilip jatyr. Aqtóbe oblysynyń politsiia departamenti turǵyndarǵa mundai «qyzyqty» zattar óte qaýipti bolýy múmkin ekenin eskertedi. Kóterý, tasymaldaý, olardy bólshekteýge tyrysýǵa bolmaidy. Tabylǵan zattar týraly dereý politsiiaǵa habarlaý kerek», - dedi oblystyq PD baspasóz qyzmetiniń jetekshisi Erbolat Sarqulov.
