Foto: ashyq derekkóz
Aqtóbe oblysynda Bestamaq aýyldyq okrýginiń ákimi óz-ózine qol jumsaýǵa árekettengen. Bul týraly oblystyq politsiia departamenti habarlady. Qazir atalǵan fakti boiynsha sotqa deiingi tergeý amaldary júrip jatyr.
Oqiǵa 7 shilde kúni tirkelgen. Alǵa aýdanynyń ákimi Aslanbek Shúiinshalievtiń aitýynsha, Qanat Dáýletalin 30 maýsymda eńbek demalysyna shyqqan. Aýdan basshysy onyń jaǵdaiy týraly tek aýrýhanaǵa túskennen keiin ǵana habardar bolǵanyn aitty.
Aqtóbe oblystyq densaýlyq saqtaý basqarmasynyń málimetinshe, 47 jastaǵy er adam Alǵa aýdandyq aýrýhanasyna jetkizilgen. Qazir onyń jaǵdaiy turaqty, jalpy palatada em qabyldap jatyr. Biraq patsient meditsinalyq diagnozyn jariialaýǵa ruqsat bermegen. Sol sebepti onyń naqty jaǵdaiy qupiia kúiinde qaldy.
Quzyrly organdar qazirgi ýaqytta oqiǵanyń barlyq mán-jaiyn anyqtap jatyr.
