Aqtóbede memlekettik organdaǵy laýazymdy tulǵalardyń biýdjet qarajatyn jymqyrý faktisi tekserilip jatyr, dep habarlaidy "Ult aqparat" Qarjy monitoringi komitetine silteme jasap.
Qarjy monitoringi komitetiniń Aqtóbe oblysy boiynsha ekonomikalyq tergeý departamenti «Qazyna» jedel aldyn alý sharasy aiasynda biýdjet qarajatyn jymqyrý faktisin anyqtady.
«Jergilikti biýdjet esebinen bastapqy, negizgi orta jáne jalpy orta bilim obektileriniń qurylysy men jóndeý» memlekettik baǵdarlamasyn júzege asyrý barysynda Aqtóbe qalasynyń qurylys bólimi men bir seriktestik arasynda jalpy somasy 1,5 mlrd teńgeniń kelisimsharty jasalǵan. Ol boiynsha Aqtóbe qalasynyń bir aýdanynda 900 oryndyq orta mekteptiń qurylysy boiynsha memlekettik satyp alý qurylys-montajdaý jumystary týraly kelisimshartqa qol qoiylady. Alaida, jariialanǵan jumys tolyq kólemde júrgizilmei, saldarynan kelgen zalaldyń mólsheri 21,8 mln teńgeni quraǵan.
Bul fakt boiynsha QR QK 189-baby 4-bólimi 2-tarmaǵyna sáikes sotqa deiingi tergeý amaldary júrgizilip, jymqyrý faktisine memlekettik organdaǵy laýazymdy tulǵalardyń qatysy bar-joǵy tekserilip jatyr.
