Aqtóbede 12 jastaǵy balanyń denesi tabyldy. Boljam boiynsha ony it talap tastaǵan, dep habarlaidy QazAqparat.
Oqiǵa 9 maýsym kúni bolǵan. Aqtóbe oblystyq Politsiia departamenti baspasóz qyzmetiniń habarlaýynsha, Eset batyr turǵyn úi alabynyń №3 shaǵyn aýdany aýmaǵynda ornalasqan qurylys nysandarynyń aýmaǵynda 12 jastaǵy balanyń denesi tabyldy.
«Kámelet jasqa tolmaǵan balanyń qan joǵaltý, bastyń, deneniń, qol men aiaqtyń kóptegen jaraqattary túrindegi zorlyqpen ólý belgileri bar máitiniń tabylý deregi boiynsha qylmystyq is tirkeldi. Aldyn ala boljam boiynsha ólimniń sebebi janýardyń tisteýinen bolýy múmkin. Atalǵan fakti boiynsha birqatar sot-meditsinalyq saraptama taǵaiyndaldy. Sotqa deiingi tergeý amaldary júrgizilip jatyr», - dep habarlady oblystyq PD baspasóz qyzmeti.
Aqtóbe oblysynyń óńirlik kommýnikatsiialar qyzmetinde oblys ákiminiń orynbasary Jaqsyǵali Imanqulov osy oqiǵaǵa qatysty aqparat berdi.
«Bolǵan jaǵdaiǵa bailanysty ata-anasyna baryp, kóńilin surap kelip otyrmyz. Eset batyr turǵyn úi alaby úshinshi shaǵyn aýdanda ornalasqan. Keshe balanyń denesi tabyldy. Qazirgi kezde oblystyq PD tergeý júrgizip jatyr. Sot-meditsinalyq jáne gistologiialyq saraptama jasalyp jatyr. Bul 10-15 kúnge sozylady. Oblys ákimi Ońdasyn Orazalin men oblystyq PD bastyǵy isti baqylaýǵa aldy», - dedi oblys ákiminiń orynbasary Jaqsyǵali Imanqulov.
Aita keteiik, Aqtóbe qalasy Almaty aýdany Eset batyr turǵyn úi alaby boiynsha biyl itke qatysty 14 habarlama túsken.
