Túrkistan oblysynyń politseileri úsh oblystyń aýmaǵynda qymbat sheteldik kólikterdi urlaýmen ainalysqan aimaqaralyq qylmystyq topty ustady, dep habarlaidy "Ult aqparat" Polisia.kz-ke silteme jasap.
Shymkentte politsiia urlanǵan «Toyota Camry 55» avtokóligin tárkiledi, ony kúdiktiler tórt million teńgege satyp úlgergen jáne urlanǵan avtokóliktiń esigin ashqan elektrondy skaner apparaty da aiǵaqty zat retinde alyndy. Túrkistan qalalyq Politsiia basqarmasyna jergilikti turǵyn «Toyota Camry 55» markaly avtokóligi urlanǵany týraly aryzdanǵan.
Bul is Qylmystyq kodekstiń 188-baby 4-bóligi (asa iri kólemdegi urlyq) boiynsha sotqa deiingi tergeýdiń biryńǵai tizilimine tirkeldi. Qylmysty ashý úshin tájiribeli qyzmetkerlerden jedel-tergeý toby quryldy.
Tergeý barysy men urylardy ustaý týraly oqiǵanyń basy-qasynda júrgen oblystyq PD bastyǵynyń orynbasary Qurmanbek Sahov tolyǵyraq aityp berdi.
«Arnaiy júrgizilgen operatsiia nátijesinde bizdiń jedel ýákilder tórt kúdiktini ustady. Olardyń tórteýi Aqtóbe oblysynyń turǵyny, onyń ishinde ekeýi dekstrýktivti dini aǵymnyń múshei bolyp shyqty. Ustalǵandardyń úsheýi buryn qaraqshylyq jáne qarý saqtaǵany úshin sottalǵan. Kúdiktiler qamaýǵa alyndy. Tergeý barysynda qylmystyq top músheleriniń aldyn-ala jospar boiynsha, árqaisysy óz rólin somdaý arqyly áreket etkeni anyqtaldy. Kúdiktiler quny 10 million teńgeden asatyn avtokólikti arnaiy skanerleý qurylǵysynyń kómegimen ashqan. Olar kólik ielerin baqylap, esikterin ashqan kezde elektrondy qulyptardy skanerlegen. Seziktiler qymbat kólikke qol jetkizgennen keiin, olardy turaqtan nemese kóshelerden urlap, aidap áketken. Tergeý búgingi kúni kúdiktilerdiń bes kólik urlyǵyna qatysty ekenin anyqtady. Olar bes qylmystyń ekeýin Aqtóbe qalasynda, ekeýin Túrkistan oblysynda jáne bireýin Qyzylorda oblysynda jasaǵan. Qazirgi ýaqytta sotqa deiingi tergeý júrip jatyr. Sondai-aq kúdiktilerdiń basqa da osyndai qylmysqa qatysy bar-joǵy anyqtalýda», - dedi Sahov.
