Aqtóbe oblysynda 2 myńǵa jýyq adam dini ahýal boiynsha esepte tur. Bul týraly óńir ákimi Ońdasyn Orazalin Ortalyq kommýnikatsiialar qyzmetinde málim etti, dep habarlaidy QazAqparat.
«Meniń oiymsha, bul jerde burynǵy jyldarmen salystyrǵanda dini ahýal sondai kúrdelenip bara jatyr dep aita almaimyz. Árine, destrýktivti dini aǵymdarda júrgen biraz jerlesimiz bar. Biz túsinýimiz kerek. Olar da Qazaqstannyń azamattary, syrttan kelgen bóten adam emes. Sol turǵydan qaraýymyz qajet. Árine adam bolǵan soń, onyń saiasi da, dini jaǵynan da kózqarasy ártúrli bolýy múmkin. Biz bir jaǵynan zaiyrly memleketpiz», - degen ákim Konstitýtsiia boiynsha dinderge teń quqyq berilgenin eske saldy.
«Olarǵa biz «Ári ket» dep aita almaimyz. Qolymyzdan kelgenshe artyq iske barmaǵanyn tileimiz. Mundaǵy birden-bir másele – olardy áleýmettendirý. Ózderine, janynda júrgen joldastaryna jumys usyný, balalaryn qalypty mektepterde oqytý siiaqty siiaqty baýyrǵa tartý sharalaryn jasap jatyrmyz. Ár aýdanda óziniń tiisti josparlary bar. Árine, keibir aýdandarda dini ahýal óte kúrdeli de bolýy múmkin. Biraq oblysta burynǵy jyldarmen salystyrǵanda asyp bara jatqan problema joq. Dei turǵanmen bul baǵyttaǵy jumystardy jalǵastyramyz. Óitkeni óńirde 2 myńǵa jýyq jerlesimiz destrýktivti dini aǵymdardyń esebinde tur. Biz ony jaý dep eseptemeiik. Ózimizdiń ishimizden shyqqan baýyrlar, jerlesterimiz. Bularǵa túsindirý, áleýmettendirý jumystaryn júrgizip, jumys ornyn taýyp berip, kásipkerlikpen ainalysýyna múmkindik jasaýymyz kerek», - dedi Ońdasyn Orazalin.
