M.Ospanov atyndaǵy Batys Qazaqstan meditsina ýniversiteti internderi memlekettik emtihanda túgel tómen ball jinady. Másele QR Densaýlyq saqtaý ministrligine jetip, ball qaita eseptele bastady, dep habarlaidy QazAqparat.
Ospanov atyndaǵy Batys Qazaqstan memlekettik ýniversitetinde biyl 400-den astam intern memlekettik emtihan tapsyrdy.
Odan súrinbei ótkenderi men joǵary ball jinaǵandary rezidentýraǵa qujat tapsyryp, naqty mamandyq tańdai alady.
Al internnen soń jumysqa kirisetinderi jalpy tájiribeli dáriger bolyp, emhanada ýchaske boiynsha naýqastarǵa em júrgizedi.
Óz nátijesimen kelispegen internder oiyn ashyq aityp, qarsylyq bildirdi.
«7 jyl boiy oqyp-toqyǵan bilimimizdi qorytyndylaityn emtihan tapsyrdyq. Barlyǵy 100 suraq berildi. Suraqtar jalpy tájiribeli dáriger deńgeiine sáikes boldy, qiyndyq týdyrmady. Emtihan tapsyrýǵa daiyndyq bir jyl buryn bastalady, bilimimizdi tekserý úshin aldyn ala synaq testileýden de ótemiz. Biz jaqsy nátijege qol jetkizetinimizge sengen edik. Biraq bárimiz 60-70 ball tóńireginde jinadyq. Qazaqstan boiynsha birneshe meditsina oqý orny internderiniń barlyǵy derlik alǵan baldarymyzdyń tym az diapazonda bolýy kúmán týdyrdy, óitkeni árkimniń deńgeii ártúrli. Biz óz oiymyzdy ashyq aityp, narazylyq bildirdik. Testileý nátijesin qaita qaraýdy nemese bizdiń durys emes jaýaptarymyzdy kórsetýdi suradyq. Qazir tehnikalyq qatelik ketkenin aityp, internderdiń baly qaita eseptelip jatyr», - dedi Marat Ospanov atyndaǵy BQMÝ interni Gúljamal Saǵidollova.
Keiin QR Densaýlyq saqtaý ministrligi tekserý júrip jatqanyn málimdedi.
«Test upailaryna qatysty tekserý júrip jatyr. Tekserý aiaqtalǵan soń nátijesin aitamyz. Eger ball esepteý kezinde qatelikter bolsa, stýdent paidasyna sheshiledi. Eger tómen baǵanyń sebebi anyqtalmasa, qaita emtihan tapsyrýǵa suranys jiberiledi», - dedi QR Densaýlyq saqtaý ministrligi.
