Aqtóbe qalasynyń ákimdigi shahardyń 150 jyldyq mereitoiyna orai josparlanǵan merekelik is-sharalar men arnaiy jobalar týraly aqparattandyrýdy jalǵastyrýda. Josparǵa sáikes, jyl boiy mádeni jáne áleýmettik sipattaǵy 300-den astam is-shara ótkizilmek. Mereitoilyq aktsiialar men jobalar kún saiyn júzege asyrylatyn bolady.
Sondai mańyzdy oqiǵalardyń biri retinde Aqtóbe qalasynda týǵan jáne qazirgi ýaqytta shet elderde turyp jatqan azamattardy baǵaly syilyqtar kútip turǵanyn aitýǵa bolady. Olar úshin qala ákimdigi Aqtóbedegi ómirine bailanysty úzdik hattar men jazbalar baiqaýyn uiymdastyrady.
Bul shyǵarmashylyq báseke 2019 jyldyń qyrkúiegine deiin jalǵasady, sol kezde mereitoǵa arnalǵan negizgi sharalar ótedi dep kútilýde. Qala ákimdigi shetelden kelgen barlyq otandasymyzdy múmkindiginshe óz týǵan jerine kelýge jáne mereitoiǵa belsene atsalysýǵa shaqyrady.
"Qazirgi ýaqytta biz búkil álem boiynsha jerlesterimizdi izdestirýdemiz. Eger siz ózińizdiń týǵan qalańyzben bailanystyratyn oqiǵalardy, týǵan qalańyzdan jyraqtaǵannan keiingi ómirińizdiń qalai órbip jatqanyn, qandai jetistikterge jetip, biikterdi baǵyndyrǵanyńyzdy aitýǵa daiyn bolsańyz, bizge áleýmettik jeliler arqyly jazyńyz, Aqtóbe qalasy ákimdiginiń akimat@akt.gov.kz elektrondyq poshtasyna hat joldańyz nemese 8-7132-41-64-02 telefony boiynsha habarlasyńyz.
Qaladaǵy ómirińizge bailanysty eń qyzyqty oqiǵalardyń jariialanymy úshin baǵaly syilyqtar men kádesyilar ázirlenýde. Jazyńyz, qońyraý shalyńyz, kelińiz, ózińiz týraly aityńyz! Hattarmen birge fotosýretter bolýy mindetti. Biz qýana-qýana keri bailanysqa shyǵamyz jáne biz úshin jerlesterimizben kezdesip, olardyń ómirleriniń búgingi kúni qalai ótip jatqany týraly bilý – óte mańyzdy", dep atap ótti Aqtóbe qalasynyń Ákimi Ispanov Ilias Saparbekuly.
Aita keteiik, qazirgi tańda Aqtóbeniń 150 jyldyǵyna arnalǵan monýment turǵyzý jumystary bastalyp ketti. Sonymen qatar qala tarihy týraly derekti film túsirýge ázirlik sharalary júrgizilýde, birqatar jańa áleýmettik nysandar men óndirister ashý josparlanǵan. Sondai-aq, qala basshylyǵy halyqaralyq, respýblikalyq jáne óńirlik mańyzy bar kóptegen konkýrstar, festivaldar men kontsertter ótkizbek. Mereitoi barysynda qazaqstandyqtar álemge tanymal ánshi Dimash Qudaibergenniń de ónerin tamashalaityn bolady.
