Búgin Aqtaýdaǵy Nazarbaev Ziiatkerlik mektebinde «Mektepterge kún energiiasy» jobasynyń ekinshi kezeńi júzege asty. Bilim ordasynda kún stantsiialary iske qosyldy. Bul týraly «Ult aqparatqa» atalmysh oqý ornynyń baspasóz qyzmeti habarlady.
Saltanatty sharaǵa Mańǵystaý oblysynyń ákiminiń orynbasary Qanybek Jumashev, «Nazarbaev Ziiatkerlik mektepteri» DBBU basqarma tóraiymy Kúlash Shamshidinova jáne «Shell Qazaqstan» kompaniiasynyń ókilderi qatysty.
Endi oqý ornynyń territoriiasyna ornatylǵan 320 panel tutynylatyn elektr energiiasyn 30%-ǵa deiin únemdeidi. Qurylǵy 100 kvt/saǵ energiia óndiredi.
Kún stantsiialarynyń iske qosý qurmeti «Shell Qazaqstan» kompaniiasynyń kommertsiialyq máseleler jónindegi bas menedjeri Eiden Merfi men bilim ordasyndaǵy 12-synyp oqýshysy, kóptegen respýblikalyq, halyqaralyq baiqaýlar jeńimpazy Ǵalammadin Asqarǵa buiyrdy.
Ziiatkerlik mektepterde ekinshi jyl júzege asyrylatyn «Mektepterge kún energiiasy» jobasy biz úshin basymdyq bolyp tabylady. Bul STEM-bilim berýdi engizý úshin jáne eń bastysy, oqýshylarymyzdyń ekologiialyq mádenietin, tabiǵatqa jaýapkershilikpen qaraýdy tárbieleý úshin tabysty joba. Búginde ornatylǵan kún júieleri mektepterdiń energiia tutynýyn shamamen tórtten bir bólikke tómendetýge múmkindik beredi jáne bul jasyl ekonomikanyń jahandyq mánin dáleldeitin kórsetkish, - dedi «Nazarbaev Ziiatkerlik mektepteri» DBBU basqarmasynyń tóraiymy Kúlásh Shámshidinova saltanatty shara barysynda.
«Mektepterge kún energiiasy» - «Shell» álemdik munai-gaz brendiniń pilottyq jobasy 2018 jyldyń 1 jeltoqsanynda «Nazarbaev Ziiatkerlik mektepteri» DBBU 10 jyldyq mereitoiyna arnalǵan «Uly dala murageleri» forýmynda QR Tuńǵysh Prezidenti N.Á.Nazarbaevqa tanystyrylǵan bolatyn. Joba Energetika ministrligi, «Shell» kompaniiasy jáne «Nazarbaev Ziiatkerlik mektepteri» DBBU birlesken memorandýmy aiasynda júzege asyp otyr.
«Shell» kompaniiasynan eń alǵashqy kún energiiasyn 2018 jyly Nur-Sultan qalasyndaǵy fizika-matematikalyq baǵyttaǵy Nazarbaev Ziiatkerlik mektebi alǵan bolatyn. Munda 100 Kvt/saǵ qýaty bar fotoelektrli panelderi ornatylǵan kólik turaǵy salyndy. Biylǵy jyly Oral, Atyraý, Almaty qalalaryndaǵy bilim oshaqtarynda osyndai kún stantsiialary ornatylady.
