Aqtaý qalasynda jomart jandar 6 balaly otbasyǵa jańa salynǵan úiden eki bólmeli páterdiń kiltin tabys etti, dep habarlaidy QazAqparat tilshisi.
Kópbalaly otbasy osyǵan deiin shahar irgesindegi iesiz jatqan óndiristik aimaqtaǵy temir vagondy panalap kelgen. Mundai syilyqty kútpegen «Kúmis alqa» iegeri Naǵima Kópjasarovanyń qýanyshynda shek joq. Onyń 2 balasy men joldasy - birinshi toptaǵy múgedek.
«Endi olardyń jyly da jaily úide turýyna múmkindik týdy», - deidi kópbalaly ana Naǵima Kópjasarova.
Qonys toiyn toilaýǵa igilikti iske uiytqy bolǵan jergilikti bilik pen «Aqjúnis» analar qoǵamynyń ókilderi de keldi. Aita keteiik, 30-shaǵynaýdandaǵy páter «K7 Grour» qurylys kompaniiasynyń demeýshiligimen berilgen.
«Búgin - eń qýanyshty kún. Bul otbasymyz úshin keremet jańalyq boldy. Áli de tolqyp turmyn. Qyzdarym qatty qýanyp jatyr. Mundai páterge qol jetkizemin dep eshqashan oilaǵan emespin. Qýanyshtymyn, qoldaý kórsetken jandarǵa Alla razy bolsyn», - deidi qýanyshyn jasyra almaǵan Naǵima Kópjasarova.
«Qoldan kelse, adamgershilik jasap, kómek kórsetkenge ne jetsin. Óz atymnan, «Aqjúnis» analar qoǵamynyń atynan úlken alǵysymdy aitamyn. Naǵima Kópjasarova osy úide bala-shaǵasymen, otaǵasymen baqytty ómir súretinine senemiz. Otaǵasy Serik aǵamyz qoly altyn sheber eken. Aǵashtan ártúrli buiymdar jasaidy. Biz ol kisini Aqtaý qalasy boiynsha «Biznes 3 kúnde» jobasyna tartýdy oilap otyrmyz. Sol arqyly ol kisiniń kásibin damytýǵa qol ushyn bergimiz keledi», - deidi «Aqjúnis» analar qoǵamynyń oblystaǵy jetekshisi Anar Shamshadinova.
