Aqtaý qalasynyń bas sanitar dárigeri Ásima Jarylǵasova úi jaǵdaiynda óz betinshe dezinsektsiia jasaý adam ómirine qaýipti ekenin aitty, dep habarlaidy "Ult aqparat".
Oblysynyń qoǵamdyq kommýnikatsiia ortalyǵynda ótken brifingte Aqtaý qalasynyń bas sanitar dárigeri turǵyndardy óz betinshe nysandarǵa dezinsektsiia jasamaýǵa shaqyrdy.
Onyń aitýynsha, 1, 2, 3-klastaǵy himiialyq zattarmen tek arnaiy litsenziiasy bar mamandardyń dezinsektsiia jasaýyna bolady. Al úi jaǵdaiynda óz betinshe 4-sanattaǵy preparattarmen jumys isteýge ruqsat etilgen.
«Jalpy zalasyzdandyrý jumystary mindetti túrde respýblikalyq reestr tiziminde bar preparattarmen júrgiziledi. Iaǵni, sol tizimde joq zattardy respýblika aimaǵynda paidalanýǵa qatań tyiym salynǵan. Reestr tizimi internet jelisinde bar», - dedi Ásima Jarylǵasova.
Jýyrda Aqtaý qalasynyń eki turǵyny himiialyq ýlanýdan qaitys boldy. Quzyrly organdar anyqtaǵandai Aqtaý qalasynyń turǵyny «Kvikfos» preparatymen (jándikterge qarsy preparat) kórshilerin eskertpesten óz páterin dezinsektsiialaidy. Páterin zalalsyzdandyryp bolǵan soń, úiin kilttep basqa shaǵynaýdanǵa ketken. Keiin kórshileriniń densaýlyǵy nasharlai bastaǵan. Saldarynan kórshi áiel men onyń qyzy kóz jumdy.
Spikerdiń málimetinshe, óńirde jándikterdi ýlaý preparattaryn úi jaǵdaiynda qoldanyp, saldarynan bolǵan qaiǵyly oqiǵa faktileri 2017, 2018, 2019 jyldary tirkelgen.
«Qaladaǵy barlyq turǵyn úilerdiń tazalyǵyna jaýapty mekemelerde zalasyzdandyrýmen ainalysatyn uiymdardyń tizimi bar. Máselen, Aqtaýda tazalaý jumystaryn júrgizýge ruqsaty bar 8 mekeme jumys isteidi. Qala turǵyndary kez-kelgen ýaqytta arnaiy uiymdardyń qyzmetine júgine alady. Eger úide zararsyzdandyrý júrgizilse, turǵyndar mindetti túrde ony kórshilerine eskertip, podezge habarlandyrý ilýi qajet. Bul – ýlaný jaǵdailarynyń aldyn alady», - dedi Ásima Jarylǵasova.
Osy baǵytta jergilikti atqarýshy organdar men sanitariialyq-epidemiologiialyq qyzmetiniń mamandary turǵyndar arasynda únemi profilaktikalyq jumystardy júrgizip otyrady.
