Týystary marqum bilmeýi tiis bolǵan maǵlumattardy bilip qoiǵany úshin óltirilgen degen boljamyn aityp otyr. Ol únemi barlyq týysynan aqsha suraýmen bolypty. Ákesi uly qiyn jaǵdaiǵa tap bolyp, sodan keiin óltirilgen dep esepteidi.
"Bireýden bes myń suraǵan eken. Ol aqshanyń bárin neǵyla beredi dedim. Sol kezde 5 myń atańa nálet dep, salyp jiberýim kerek edi. Oilamadym ǵoi, mundai bolady dep, demek, balamnan aqsha suraǵan. Aqsha bermegennen keiin uryp óltirgen de. Basqa nesi bar. Asylyp qaldy deidi, balam meniń asylmaǵan. Kózim jetedi oǵan. Bular óltirip alyp, sodan keiin jala jaýyp otyr", - deidi ákesi Baqyt Altynbekov.
Istegi túsiniksiz jaittardy marqumnyń dostary da aityp otyr. Toǵyz ai qyzmette júrgen sarbaz otbasynyń jaǵdaiyna bailanysty ólgisi keletinin jaza bastaýy aqylǵa qonbaidy, deidi olar. Olardyń pikirinshe, sarbaz jazdy degen sońǵy hattaǵy mátin de bir ǵana adamnyń qolymen jazylmaǵan.
"Ár hatta ártúrli jazylǵan. Maǵan jazylǵan hatta basqasha jazylǵan, mamasyna jazylǵan hatynda jazýy múldem basqasha. Ekeýin eki adam jazǵan. Onyń jazýy sál nasharlaý edi. Tipti dápterge jazǵanda alfavittiń arasynda "y", "i" degen áripti jazbai tastap ketýshi edi, bir eki áripti. Al bul jerde hatta "y", "i" áripter bylai tursyn, útir-núktege deiin mánerlep jazylǵan. Edil olai jazbaidy", - deidi marqumnyń dosy Ersultan Qanjigit.
Ulynyń denesin Aqtaýdan alyp kelgen anasy Edildiń shaty kógerip ketkenin aitady. Meditsina salasynda istegen ol ulynyń qasaqana óltirilgenine senimdi.
"Men ózim hirýrgiiada istegem ǵoi, biz de máiithanadan adam shyǵarǵanbyz. Ol denesinen jylý ketkennen keiin qalatyn edi, moiny, bar jeri qatyp qalady, qimyldamaityn. Munyń moiny, omyrtqalary ana jaqqa, myna jaqqa ainalyp jatyr. Ony ádeii óltirgen negizi, sóitken de, ózi darǵa asyldy qyla salǵan", - deidi marqumnyń anasy Naǵima Nurbaiqyzy.
Al sarbazdyń máiitin jetkizgen áskeri bólimniń komandiri keshirim retinde million teńge ákelgenin aitqan. Biraq marqumnyń jaqyndary óre túregeldi. Qazir tergeý júrip jatqanyn aitqan basshy "Edil jii esinen tanyp qala beretin" deidi.
"Esinen tanyp qalatyn, aýa jetpei. Armiiaǵa kelgennen beri. Toǵyz ai boiy emes, osy sońǵy aida ma, sol kezde bir ret ketti. Esinen tandy, odan keiin gospitalǵa ketti, Aqtaýǵa, emdeldi", - deidi QR UQK shekara qyzmeti basqarmasy bastyǵynyń mindetin atqarýshy Asqar Aiaǵanov.
Telearna tilshileriniń aitýynsha, qazir áskeri tergeý basqarmasy shekarashynyń ólimi boiynsha qylmystyq is qozǵap, arnaiy tekserýdi bastady. Biraq bul týraly ne Qorǵanys ministrligi, ne shekara qyzmetindegiler resmi aqparat bergen joq.
Eske salaiyq, 4 maýsymda Mańǵystaý oblysyndaǵy shekara qyzmetinde merzimdi qyzmettegi sarbazdyń ólimi habarlanǵan edi. Ol sýitsid jasady delindi.
Bul jaǵdaiǵa qatysty Prezident te pikir bildirgen. Edil Teshebaevtyń ólimi habarlanǵan kúni Qasym-Jomart Toqaev áskerdegi ólim sebepterin tergeý jónindegi arnaiy komissiia qurýdy jáne bolashaqta mundai jaǵdaidyń aldyn alýdy tapsyrǵan.
6 maýsymda Qorǵanys ministrligi ókilderi "áskerdegi ólimge jol bermeý" boiynsha baǵdarlama ázirlenip jatqanyn habarlady.
