Aqtaýda 6 jasar qyzdy zorlady degen kúdikti ustaldy, - dep habarlaidy Ult.kz tilshisi kaz.tengrinews.kz portalyna silteme jasap.
Keshe, 22 tamyzda politseiler 6 jasar qyz joǵalǵan dúkende videokameraǵa túsip qalǵan er adamdy ustady.
Kúdikti Aqtaý túbindegi qurylystardyń birinen tabylǵan.
"Qazirgi ýaqytta ustalǵan er adamnyń bul qylmysqa qatysyn anyqtaý maqsatynda birqatar saraptama júrip jatyr. Tergeý múddesine bailanysty ózge málimetter jariia etilmeidi", - dedi Mańǵystaý oblystyq IID baspasóz qyzmetiniń ókili Sholpan Iýldasheva.
Eske salaiyq, oqiǵa 20 tamyzda Aqtaý qalasynda bolǵan. Túske deiingi ýaqytta ájesi 6 jasar nemeresimen №1 yqshamaýdandaǵy jumysyna kelgen. Nemeresine qaraýǵa ýaqyty bolmaǵan ájesi balasyna telefon soǵyp, qyzyn alyp ketýin surapty. Birshama ýaqyt ótkennen keiin áiel óz nemeresiniń joq ekenin baiqaidy. Bastapqyda ol nemeresin ákesi alyp ketti eken dep oilaidy. Alaida telefon soǵyp, qyzdyń ákesiniń kelmegenin bilgen ol nemeresin ózi izdei bastaidy. Joǵalǵan qyzdyń týystary ony bastapqyda ózderi izdegen. Arada 2,5 saǵat ótkennen keiin olar politsiiaǵa habar bergen. Joǵalǵan qyzdy izdestirýge Mańǵystaý oblystyq ishki ister departamentiniń jeke quramy túgeldei jumylǵan.
Politsiiadaǵylar qyzdyń sol kúni 17.30 shamasynda tabylǵanyn habarlapty. Qyzdyń jaǵdaiy aýyr bolǵan, kóp qan joǵaltqan, kún ótip ketken. Tártip saqshylary ony "Nur Plaza" jaǵalaýyna qarama-qarsy saiajaidan tapqan. Qyz balalar aýrýhanasynyń jansaqtaý bólimine jatqyzyldy. Osy ýaqytta politseiler birneshe kúdiktini izin sýytpai ustaǵan. Politsiianyń málimetinshe, qazirgi ýaqytta ustalǵandardyń bul qylmysqa qatysy bar-joǵyn anyqtaý úshin sot-meditsinalyq saraptama júrgizilip jatyr. Al keiin politseiler 6 jasar qyzdy zorlaǵan adamdy izdestirýge kómek surap, kúdiktiniń baǵyttamasyntaratty. Osy derekke "Zorlaý" baby boiynsha qylmystyq istiń qozǵalǵany belgili.
