Aqtaý qalasynda Ábish Kekilbaev atyndaǵy mádeni ortalyq qurylysy qarqyndy júrip jatyr, dep habarlaidy "Ult aqparat".
Alty Alashtyń abyzy bolǵan birtýar qalamger, qoǵam qairatkeri Ábish Kekilbaev Mańǵystaýdy ashyq aspan astyndaǵy murajai dep ataǵan edi. Biyl jazýshynyń 80 jyldyq mereitoiy atap ótilmek. Osyǵan orai, Aqtaý qalasynyń 19a yqshamaýdanynda Ábish Kekilbaev atyndaǵy mádeni ortalyq boi kótermek.
Jańa qurylys qarqynymen oblys ákimi Eraly Toǵjanov tanysyp, jaýapty mamandarǵa atalmysh ortalyqtyń qurylysy biylǵy jyldyń kúz aiynda aiaqtalyp, paidalanýǵa berilýi kerek dep tapsyrdy.
Sondai-aq, óńir basshysy qurylys materialdarynyń sapasymen de tanysty. Jospar boiynsha bul jerde 2 qabatty Ábish Kekilbaev mádeni ortalyǵy, oblystyq mýzei men kitaphana ashylatyn bolady. Ǵimarat ortasynda sýburqaq ta bolmaq. Jalpy aýmaǵy 7,7 gektardy alyp jatqan qurylysta qazir 80-ge jýyq jumysshy eńbek etýde.
Aita keteiik, oblys mektepterinde «Ábishtaný» synyptary da ashylǵan bolatyn.
