Almaty qalasy Alataý aýdany ákimi Azamat Qaldybekov "Habar 24" jýrnalisin ǵimarattan kúshtep shyǵaryp jiberý oqiǵasyna qatysty pikir bildirdi. Ol bul jaǵdaiǵa qatysty tiisti sharalar qoldanylatynyn aitty, - dep habarlaidy Tengrinews.kz tilshisi.
Alataý aýdany ákimi bul oqiǵa kezinde ǵimaratta bolmaǵanyn aitty. Ol bul ýaqytta "Sheksiz qala" baǵdarlamasy aiasynda qalany aralaýǵa shyqqan eken. Ol ǵimaratqa týrnikettiń astynan ótken jýrnaliske kúzetshi kúsh qoldanyp, shyǵaryp jibergenine qatysty pikir bildirdi.
"Tolyǵymen mán-jaidy sizderge qosymsha habarlaimyz. Búgin komissiia qurdyq, ony meniń orynbasarym Bektas Sábitov tolyq júrgizedi. Onyń nátijesi boiynsha tiisti shara qoldanylady. Basymdy ala qashyp, bireýdi qorǵap turǵan joqpyn. Tek kúzetshi emes, osyǵan jaýapty memlekettik qyzmetkerler de óz áreketine jaýapty bolady", - dedi Azamat Qaldybekov.
Alataý aýdany ákiminiń aitýynsha, ol tilshige qatysty jaǵdaidy buǵan deiin bilmegen. Tilshilerdiń "orynbasarlaryńyz jetkizdi me osyndai jaǵdai bolǵanyn" degen suraǵanyna ákim jaǵdaidy kesh estigenin aitty. Sondai-aq, ol kúzet qyzmetkerine tilshini kirgizbeý týraly tapsyrma túspegenin aitty.
"Kúzet kompaniiasy - jekemenshik kompaniia. Olar arzan baǵa usynyp, tenderdi jeńip aldy. "Arlan" JSSh degen mekeme. Naýryzdan bastap qyzmetine kirisip jatyr. Biraq meniń atymnan, bolmasa basqanyń atynan kirgizbeý týraly tapsyrma túspegen", - dedi ákim.
Sondai-aq, ákim Tengrinews.kz tilshisiniń jýrnalist ákimdikke birneshe kún kelip kire almaǵyny týraly suraǵyna "tilshi bir kún kelgenin, onyń aldynda Naýryzbai aýdany ákimdigindegi jaǵdai bolýy múmkin ekenin" aitty. Aýdan ákimi jaǵdai anyqtalyp, tekseris aiaqtalǵan soń jýrnalisten keshirim suraýdan bas tartpaitynyn jetkizdi.
Aita keteiik, "Habar 24" jýrnalisi Almatyda ákimdik ǵimaratynan kúshtep shyǵarylǵany habarlanǵan bolatyn. Oqiǵanyń videosyn tilshi Facebook-paraqshasynda jariialady. Bul jaǵdai búkil BAQ ókilderi men el nazaryn aýdartty. Keiinirek Almaty qalasy Alataý aýdany ákimdigi jaǵdaiǵa túsinik berdi.
Sondai-aq, aqparat jáne qoǵamdyq damý ministri Aida Balaeva oqiǵaǵa qatysty Facebook-paraqshasynda jazba jariialady. Ol Alataý oblysy ákimdigindegi kúzet qyzmetkeriniń áreketi zańsyz ekenin jazdy.
