Qostanai turǵyny eki reseilikti úiine ornalastyryp, qujattaryn rásimdeýge kómektesti, - dep habarlaidy Massaget.kz.
Qostanailyq Maksim Glazkov qiyn jaǵdaiǵa tap bolǵan reseilikterge alǵashqylardyń biri bolyp kómek qolyn sozdy. Ol Reseiden qonys aýdarýshylar aǵyny bastalǵan kezdiń birinshi kúni-aq áleýmettik jelilerde kórshi elden kelgen eki er adamǵa baspana berýge daiyn ekenin jariialady. Sebebi qonaqúilerde oryn joq, al jalǵa beriletin turǵyn úi baǵasy sharyqtap ketken.
"Bireýdiń qaiǵysynan aqsha tabýdy kózdegen adamdar meni tańǵaldyrady. Sonymen qatar, mundai aqsha eshqashan baqyt ákelmeidi jáne is bastaýǵa da jetpeidi. Kómek kórsetkenim úshin aqy suramadym, jigitter keldi, qajet bolǵansha turyńdar, bir dastarqannan tamaqtanamyz, jaily turý úshin barlyq jaǵdailar jasalǵan dedim. Jyldar boiy jinaǵannyń bárin tastap, birer minýt ishinde sheshim qabyldaýdyń qandai stress ekenin túsinemin", - deidi Maksim Glazkov.
Kelesi kúni Maksim qonaqtaryna óz mekenjaiy boiynsha tirkelýge ǵana emes, taǵy eki kelýshige de kómektesti. Qostanaida turaqtaǵan er adamdar oǵan óte riza. Sonymen qatar, munda olardy qalai kútip alǵanyna tańǵaldy.
"Árine, mazasyz oilar boldy, biraq bizdi óte jyly qabyldady. Biz qalany aralap júrgende bizge tórt ret kómek usynyldy, tipti pastor da kólikten shyǵyp, túneýge bolatyn mekenjaidy aitty. Sodan keiin biz túski as ishetin kafege bardyq, sonda bizge Maksimniń nómirin berdi. Onyń arqasynda biz tirkeldik, karta men baspana aldyq", - deidi Ekaterinbýrgten kelgen marketolog Aleksandr.
Qostanailyq turǵyn reseilikterge olar qansha qajet bolsa, birge tura alatynyn aitty. Olardyń biri Qazaqstanda qalǵysy keledi, alaida qai qalada turatynyn ázir sheshpegen, ekinshisi tek tranzitpen ótedi.
"Munda adamdar óte meiirimdi jáne qamqor, men tańǵaldym. Árine, Reseide bul qiyn. Tiýmende meniń áielim qaldy, men osynda bolamyn, keiin Kiprge baramyn", - dep Aleksei bolashaq josparlarymen bólisti.
