Foto: AQSh elshiligi
Ortalyq Aziiada Qazaqstan azamattaryna ǵana AQSh-tyń 10 jyldyq migratsiialyq emes vizasy beriledi. Bul týraly Qazaqstandaǵy AQSh elshisi Deniel Rozenbliým jýrnalistermen ótken dóńgelek ústelde aitty, dep habarlaidy QazAqparat agenttigi.
Tilshilerge bergen jaýabynda AQSh elshisi viza jóninde suraqtar jii qoiylatynyn, AQSh azamattarynyń da Qazaqstanǵa jii kelýin qalaitynyn, sondyqtan rásimderdi jeńildetýge múddeli ekenin aitty.
«Qazaqstan – AQSh-tyń 10 jylǵa deiingi immigratsiialyq emes vizasy beriletin Ortalyq Aziiadaǵy jalǵyz el. Bul bizdiń qarym-qatynastyń qandai joǵary ekenin kórsetedi. Degenmen, AQSh-tyń oryndalýy mindetti erejeleri men zańdary bar. Jáne eń bastysy – vizany basqa maqsatta qoldanǵysy keletin adamdarǵa múmkindik bermeý. Sol úshin de viza bererde suhbattasý, qujat tekserý sekildi tájiribeler bar», - deidi Rozenbliým.
Sonymen birge elshi bul protsesterdi jeńildetýge tyrysqanyn, dálirek aitqanda barynsha tiimdi ári ótinish berýshiler uzaq kútpeitindei uiymdastyrǵanyn atap ótti.
«Pandemiia kezinde qordalanyp qalǵan ótinimderdi irikteýdi tabysty júrgizdik dep oilaimyn, qazir kútý ýaqyty aitarlyqtai qysqarǵan. Meniń túsinýimshe, qazir AQSh-qa barǵan, AQSh-qa viza alǵan adamdar úshin vizaǵa qaita ótinim bergende suhbattan bas tartýdy suraý múmkindigi bar. Osyndai da nusqa bar, biraq bul standartty tájiribe emes», - deidi AQSh elshisi.
