22 aqpanda AQSh Ulttyq Qaýipsizdik Keńesiniń otyrysyna qatysqan, aty atalmaǵan sheneýnik Djo Baiden ákimshiliginiń "óte pessimist" ekenin ári aldaǵy 24-48 saǵatta shabýyl bastalýy múmkin ekenin aitty.
Sonymen qatar, CNN telearnasy AQSh-tyń, Ýkrainanyń jáne aty atalmaǵan batys eliniń joǵary laýazymdy sheneýnikteri arasyndaǵy derekkózderge silteme jasap, 22 aqpanda AQSh biligi Kievke Resei áskeri tolyq shabýyl jasaýǵa daiyn ekeni týraly barlaý málimetterin resmi túrde bergenin aitty. Derekkóz málimetinshe, Resei "jaqyn arada" basyp kiredi.
Sonymen qatar, reseilikter Harkovqa shabýyl jasaýdy josparlap otyr dep málimdedi. Bul sózderdi ýkraindyq sheneýnik te, amerikalyq ta rastady.
Ýkrain sheneýniginiń aitýynsha, Ýkrainanyń barlaý qyzmeti amerikalyqtardyń orys áskeri "jaqyn arada" búkil Ýkrainada áskeri operatsiiany bastaýdy josparlap otyr degen tezisterin rastai almady. Ýkraina biligi AQSh buǵan deiin de osyndai "basyp kirý kúnderi" týraly eskertkenin aitty, biraq Resei ol kúnderi shabýyl jasamaǵan.
Ýkraina prezidenti keńsesindegi aqparat kózderi mundai aqparatty amerikalyq seriktesterden alǵanyn rastady. Soǵan qaramastan, olar AQSh-tyń 2022 jyly aqpanda úshinshi ret Resei shapqynshylyǵynyń bastalatyn kúnderi týraly habarlaǵanyna kúmán keltirdi.
Al AQSh memlekettik hatshysy Entoni Blinken NBC telearnasyna Resei áskeri beisenbide tańerteń Ýkrainaǵa shabýyl jasaidy dep málimdedi.
"Ókinishke qarai, Resei óz áskerin Ýkrainamen shekarada - soltústikten, shyǵystan jáne ońtústikten tótenshe daiyndyq deńgeiine jetkizdi", - dedi Blinken.
Ol áskerdi LHR men DHR-ǵa nemese Kiev basqaratyn aýmaqtarǵa engizetini týraly aitqan joq.
"Naqty kúnin nemese ýaqytyn aita almaimyn, biraq Resei shabýylyn bastaýy úshin bári daiyn", - dedi AQSh memlekettik hatshysy.
Sonymen qatar, Blinken Ýkrainadaǵy iri qarýly qaqtyǵystyń aldyn alýǵa bolatynyna senim bildirdi.
"Meniń oiymsha, áli de basqynshylyq áreketten aýlaq bolý múmkindigi bar", - dedi ol.
