Las-Vegasta aýyr atletikadan jasóspirimder arasyndaǵy álem chempionatynda qazaqstandyq komanda bes altyn medal utyp aldy, - dep habarlaidy Tengrinews.kz tilshisi Aýyr atletika federatsiiasynyń baspasóz qyzmetine silteme jasap.
Qazaqstan quramasynyń taǵy eki sportshysy komanda qorjynyna altyn júlde alyp keldi. 81 kelige deiingi salmaqta Olga Pastýhova eki jattyǵý qorytyndysy boiynsha 215 (julqa kóterýde - 92, serpe kóterýde - 123) kelini baǵyndyryp, álem chempiony ataǵyn kezekti ret aldy. Rahat Bekbolat ta álem chempionatynda baq synady. 96 kelige deiingi salmaqta synǵa túsken ol qossaiys nátijesi boiynsha 323 kelini (julqa kóterýde - 144, serpe kóterýde - 179) kóterip, moinyna altyn medal taqty.
"Jasóspirim sportshylarymyz osy saiystarda óz kúsh-qýattaryn kórsete aldy. Árine, komandadaǵy alǵashqy jeńister Olga men Rahatty odan saiyn jigerlendirip jiberdi. Olar sol deńgeidi túsirmeý kerek ekenin túsindi. Jaqsy kóńil-kúi, tabandy jattyǵýlarymyz - osynyń bári chempionatta altyn medal alyp keldi. Komandamyzdaǵy eń jas sportshy Rahat Bekbolat úshin bul debiýt bolǵan, ol bizdi nátijesimen qýanta aldy", - dedi jastar quramasynyń bas bapkeri Baqyt Ahmetov.
Jalpy esepte Qazaqstan bes medal enshilep, senimdi jeńiske jetti.
Jalpy esep: 1. Qazaqstan - 5-0-0; 2. Ózbekstan - 2-3-1; 3. Vetnam - 2-0-1.
Buǵan deiin jasóspirimder arasyndaǵy álem chempionatynda Qazaqstannyń qorjynyna altyndy Aqmolda Sairamkez (61 kelige deiingi salmaq), Saihan Taisýev (67 kelige deiingi salmaq) pen Sápi Esengeldi (81 kelige deiingi salmaq) ákelgen bolatyn.
Aýyr atletikadan Las-Vegasta ótip jatqan álem chempionaty 15 naýryzda aiaqtalady. Bul chempionatta 50 elden 13-17 jas aralyǵyndaǵy eki júzden asa sportshy qatysyp jatyr. Qazaqstannyń atynan bes sportshy óner kórsetti.
