AQSh-ta sot alqasy Viskonsinde politseilerdiń kúsh qoldanýyna qarsy narazylyq kezinde eki adamǵa oq atqan 17 jastaǵy Kail Rittenhaýsty aqtady. The Milwaukee Journal Sentinel basylymynyń jazýynsha, sot ony "ózin qorǵaý úshin oq atty" dep tanyǵan, dep habarlaidy Azattyq.
Is AQSh qoǵamynda rezonans týdyrdy.
Oqiǵa byltyr tamyz aiynda Kenosha qalasynda bolǵan. Politseilerdiń kúsh qoldanýyna qarsylyq aktsiiasy tártipsizdikke ulasyp, oǵan BLM jáne "Antifa" siiaqty solshyl qozǵalys ókilderi qatysqan.
Rittenhaýs Kenoshaǵa ózin-ózi qorǵaý otriadynyń quramynda aýmaqty baqylaý úshin kórshi Illinois shtatynan barǵan. Otriad quramyndaǵylardyń basym bóligi ońshyl kózqarasty ustanady. Narazylyq kezinde Rittenhaýsqa birneshe adam tap berip, jartylai avtomat vintovkasyn tartyp alýǵa tyrysqan. Rittenhaýs eki adamǵa oq atyp, pistoleti bar úshinshisin jaralaǵan.
Aiyptaý taraby Rittenhaýsty alty aiyp boiynsha (arasynda "Qasaqana adam óltirý" baby da bar) kináli dep tanyp, ómir boiy bas bostandyǵynan aiyrýdy suraǵan. Al qorǵaý taraby onyń ózin qorǵaý úshin oq atýǵa májbúr bolǵanyn aitty.
Rittenhaýsty AQSh-tyń 45-prezidenti Donald Tramp qoldady. Al qazirgi prezident Djo Baiden sailaýaldy kampaniiasy kezinde násilshildikti aiyptap, videodaǵy tineidjer obrazyn paidalanǵan. Úkim shyǵar aldynda ol sot alqasynan eki prezidenttiń pozitsiiasyn eskermeýge shaqyrdy.
Sot úkimi shyqqannan keiin Djo Baiden sot alqasynyń úkimin qurmetteitinin aitty.
Onyń aitýynsha, aiyptalýshynyń aqtalǵanyn estigen jurt "ashýlanyp, ýaiymdaýy múmkin", biraq úkimge qarsy adamdar pikirlerin beibit, kúsh qoldanbai aitýy tiis. Osyǵan deiin Viskonsindegi oqiǵa boiynsha aqtaý úkimi shyqsa, jappai tártipsizdik bolýy múmkin degen qaýip aitylǵan.
