Reseilik fizik, kásipker Valentin Gapontsev AQSh-ta 83-ge qaraǵan jasynda qaitys boldy, dep habarlaidy Azattyq.
Forbes jýrnaly onyń bailyǵyn 2,8 milliard dollarǵa baǵalaǵan.
Gapontsev ónerkásip lazerin óndirýmen ainalysqan. 2018 jyly ol AQSh qarjy ministrligin sotqa berip, mekemeden ózin Resei prezidenti Vladimir Pýtinge jaqyn oligarhtar tiziminen alyp tastaýdy talap etken.
Máskeýde týǵan Gapontsev Lvov politehnikalyq institýtty jáne Máskeý fizika-tehnikalyq institýttyń aspirantýrasyn támamdaǵan. 1967 jyldan bastap SSSR Ǵylym akademiiasyndaǵy Radiotehnika jáne elektronika institýtynda jumys istegen.
Sovet odaǵy ydyraǵan soń biznespen ainalysqan. Ónerkásip lazerlerin óndirýmen, olardy satýmen ainalysqan. Onyń IPG Photonic deitin kompaniiasy – álem boiynsha ónerkásip lazerleriniń eń iri óndirýshileriniń biri sanalady. Kompaniianyń naryqtaǵy quny 8,9 milliard dollar shamasynda.
2018 jyly qańtarda AQSh qarjy ministrligi óziniń esebinde AQSh azamattyǵyn alyp úlgergen Gapontsevti Pýtinge jaqyn adamdardyń tizimine qosqan. Tizimge kirgennen keiin onyń kompaniiasy 3 milliard dollarǵa arzandaǵan, al ózi 3 milliard dollarǵa jýyq bailyǵynyń jartysynan airylǵan.
Sol jyly jeltoqsanda ol sotqa júginip, ózin tizimnen alyp tastaýdy talap etti. Advokattary ony oligarh dep ataýǵa bolmaitynyn, kásibiniń edáýir bóliginiń Reseige qatysy joq ekenin aitqan. Jarty jyldan keiin ol qarjy ministrligimen kelisimge kelip, shaǵymyn keri qaitarǵan. Gapontsev ózin osy tizimnen aldyra alǵan jalǵyz reseilik sanalady. Forbes jýrnalynyń jazýynsha, keiingi jyldary ol qaterli isik aýrýyna shaldyǵyp, emdelip júrgen.
