AQSh Memlekettik departamenti ózbekstandyq Promcomplektlogistic kompaniiasyna Reseidiń áskeri-ónerkásip keshenin qoldady degen kúdikke bailanysty sanktsiialyq shekteýler engizdi. 28 maýsymda AQSh Qazynashylyq saitynda jeke tulǵalar men kompaniialardyń jańarǵan qara tizimi jariialandy, - dep habarlaidy Tengrinews.kz tilshisi Akchabar saityna silteme jasap.
Basylymda ózbekstandyq Promcomplektlogistic kompaniiasynyń 2022 jyldyń naýryzynda sanktsiiaǵa ushyraǵan reseilik "Radiavtomatika" jaýapkershiligi shekteýli seriktestigimen bailanysy bar ekeni kórsetilgen. AQSh Memlekettik departamenti málimeti boiynsha, Promcomplektlogistic sanktsiialardy ainalyp ótýge kómektesip, Reseige mikrosulbalar bergen.
"Promcomplektlogistic jeke kompaniiasynyń sanktsiialar tizimine qosylýy búkil álemdegi bizneske eskertý bolýy kerek: eger sanktsiiaǵa ushyraǵan uiymdarmen nemese jeke tulǵalarmen biznes jasasańyz, sizge sanktsiia salý qaýpi bar", - dedi AQSh Memlekettik departamenti ókilderi.
Promcomplektlogistic basqa sanktsiialanǵan kompaniialar siiaqty AQSh Saýda ministrliginiń zańdy tulǵalarynyń derekqoryna avtomatty túrde engizilgen. Endi amerikalyq kompaniialar taýar nemese qyzmet jetkizgisi kelse, bilikten arnaiy litsenziia alýǵa týra keledi.
Sondai-aq, AQSh azamattary men shtattarda turaqty turatyn sheteldikterge qara tizimge engen adamdarmen jáne kompaniialarmen biznes jasaýǵa tyiym salynǵany aitylǵan.
Promcomplektlogistic 2018 jyly Tashkentte tirkelgen. Kompaniia kólik salasynda qyzmet kórsetýmen ainalysady.
