Sany jaǵynan 14-partiia bolyp sanalatyn jańa paket aiasynda AQSh Ýkrainaǵa áýe shabýylynan qorǵanatyn eki qondyrǵy, dúrkindete atatyn HIMARS reaktivti qurylǵysyna arnalǵan qosymsha oq-dári beredi. Buǵan qosa, 150 myń snariad pen artilleriialyq radarǵa qarsy tórt qurylǵy jiberý josparlanyp otyr, dep habarlaidy Azattyq.
"Ýkrainanyń maidandaǵy qajettilikterin óteýge múmkindigi bolý úshin AQSh odaqtastary jáne áriptesterimen birge jumys istep jatyr" dedi Pentagon ókilderi.
AQSh qorǵanys ministrligi Norvegiiamen áriptestikti erekshe atap ótip, sonyń arqasynda Kievke "Reseidiń surapyl áýe shabýyldarynan qorǵanýǵa múmkindik beretin" NASAMS kesheni jetkizilgenin aitty.
Jańa paketti qosa alǵanda 24 aqpannan beri AQSh Ýkrainaǵa shamamen 7 mlrd dollar kóleminde kómek bergen.
Juma kúni Norvegiia da Ýkrainaǵa qorǵanys salasyn nyǵaitý úshin 1 mlrd eýro bóletinin málimdedi. Bul qarajat sonymen birge Ýkraina azamattaryn qoldaýǵa jáne eldi qalpyna keltirýge jumsalmaq.
Ýkraina prezidenti Vladimir Zelenskiimen ótkizgen ortaq baspasóz máslihatynda Norvegiia premer-ministri Ionas Gar Stere ómir súrý úshin kúresip jatqan Ýkrainamen birge ekenin jetkizdi.
