Keiingi aptada Kabýl áýejaiynda jáne áýejaiǵa kirer aýmaqta Aýǵanstannyń kem degende 20 azamaty qaitys bolǵan. Olar - AQSh pen onyń odaqtastarynyń áskeri kúshteri óz elderiniń azamattaryn jáne yntymaqtas, áriptes bolǵan aýǵan azamattaryn shuǵyl evakýatsiialap jatqan áýejaidan ushyp ketýge tyrysqan adamdar. Bul jóninde jeksenbide NATO ókili aitty, dep habarlaidy Azattyq radiosy.
Kabýl áýejaiyn AQSh qarýly kúshteri baqylap tur. Oǵan barar joldyń bári ótken aptada tálipter baqylaýyna ótken. Kei habarlarǵa qaraǵanda, áli de ondaǵan myń adam tálipterdiń tosqaýylyn buzyp ótip, áýejaiǵa jetkisi keledi. Áýejaiǵa barar jolda turǵan AQSh áskeri de kez kelgen adamdy ótkize bermeidi.
Agenttik habaryna qaraǵanda ólgenderdiń keibirine oq tigen, keibiri dúrbeleń kezinde adam aiaǵynyń astynda qalǵan. Britan soldattary senbi kúni áýejaiǵa umtylǵan 7 adam aiaq astynda qalyp ólgenin rastady.
AQSh prezidentiniń ulttyq qaýipsizdik jónindegi keńesshisi Djeik Sallivannyń sózinshe, 14 tamyzdan beri Amerika áskeri 25 myńǵa jýyq adamdy evakýatsiialaǵan. Evakýatsiialanýǵa tiisti adamdardyń naqty sany belgisiz.
24 tamyzda Aýǵanstandaǵy jaǵdaidy jáne Aýǵanstannan adamdardy evakýatsiialaý máselesin "Jetilik toby" elderiniń basshylary onlain sammitte talqylaidy. Bul jóninde Ulybritaniia premer-ministri Boris Djonson aitty. Amerika áskerin Aýǵanstannan shyǵarý merzimin ári qarai soza turý qajettigi de sóz bolýy múmkin. Qazirgi merzim boiynsha, AQSh áskeri 31 tamyzda Aýǵanstannan shyǵyp ketýi tiis.
Tálipterdiń "qýǵyndamaimyz" degen ýádesine senbeitin myńdaǵan aýǵan azamaty qaitkende elden ketip qalýǵa tyrysyp jatyr. Kei aimaqtarda tálipterdiń burynǵy áskeri qyzmtkerler men politseilerdi jazalaǵany jaily aqparattar bar, biraq onyń ras-ótirigin tekserý ázirge múmkin bolmai tur.
Jeksenbde Resei Syrtqy ister ministri Sergei Lavrov "tálipter qazirgi sátte ýádelerin oryndap tur" dep málimdedi.
"Taliban" qozǵalysy Kabýldyń soltsútigindegi Panjer shatqalyn baqylai alǵan joq. Bul shatqalda tálipter biligine qarsy kúshter shoǵyrlanyp jatqany jaily aqparattar bar.
