AQSh Aýǵanstanǵa ýaqytsha 3 myń jaýynger jiberedi. Olar Kabýldaǵy elshilik qyzmetkerlerin evakýatsiialaidy.
Bul týraly beisenbi kúni AQSh memlekettik departamenti men Pentagon habarlady. Munyń aldynda ǵana "Taliban" qozǵalysynyń iri qalalardy basyp alǵany málim bolǵan.
Memlekettik departament ókili Ned Praistyń málimdeýinshe, AQSh-tyń Kabýldaǵy elshiligi jabylmaidy, biraq onyń qyzmetkerleriniń deni kóshiriledi. Keibir málimetke qaraǵanda, elshiliktiń myńnan astam qyzmetkeri Aýǵanstannan ketedi.
Pentagonnyń habarlaýynsha, amerikalyq jaýyngerler Aýǵanstanǵa eki táýlik ishinde jetip, Kabýldaǵy áýejaiǵa ornalasady. Olardyń missiiasy elshilik qyzmetkerlerin kóshirýmen shekteledi. Sonymen birge AQSh amerikalyq áskerge kómektesken aýǵandyqtardy elden alyp ketetin áýe reisterin kóbeitedi.
AQSh áskerin Aýǵanstanǵa jiberý - kútpegen qadam. Ol tálipterdiń shabýyly údei túskenin bildiredi. AQSh tamyzdyń aiaǵyna deiin Aýǵanstandaǵy áskerin shyǵaryp áketýi tiis. Qazir bul elde shamamen 650 amerikalyq jaýynger qaldy. Ol Kabýl áýejaiy men AQSh elshiligin qorǵap júr.
Arnaiy qyzmet boljamy boiynsha, tálipter Kabýldy 1-3 aida jaýlap alýy múmkin. Beisenbi kúni qozǵalys kúshteri Gazni, Gerat jáne Qandaǵar qalalaryn jaýlap alǵany málim boldy. Aýǵanstan biligi Gazni men Gerattan airylǵanyn moiyndady.
