Qazaqstanǵa kelgen reseilikter AQSh-tan pana surap, Qazaqstan aýmaǵynan ótinish túsire almaidy. AQSh-tyń Qazaqstandaǵy diplomatiialyq missiiasynyń baspasóz qyzmeti osylai dep málimdedi, dep habarlaidy Azattyq.
Diplomatiialyq missiia ókilderi kórshi elde jariialanǵan mobilizatsiiaǵa bailanysty Qazaqstanǵa reseilikterdiń aǵylyp kelýinen habardar ekenin atap ótedi.
"AQSh-tyń Astanadaǵy elshiligi men Almatydaǵy bas konsýldyǵynyń pana nemese bosqyn mártebesine bailanysty ótinishterdi qabyldaýǵa ókileti joq. Pana izdeýshiler AQSh-ta júrip ótinish túsire alady. Olarda AQSh azamattyǵy bolmaýy tiis" dep jazylǵan AQSh diplomatiialyq missiiasynyń habarlamasynda.
Pana berý týraly ótinishterdi AQSh azamattyq jáne immigratsiia qyzmeti qaraidy. Sáikesinshe dipmissiia pana izdeýshilerge solarǵa júginýge keńes beredi.
AQSh-tyń bosqyndardy qabyldaý baǵdarlamasy BUU bosqyndar isi jónindegi agenttik jáne áriptes úkimettik emes uiymdarmen birigip jumys isteidi.
Dipmissiia sonymen birge "kóshi-qon saiasaty men shetel azamattarynyń Qazaqstanǵa kirýi boiynsha kez kelgen másele" boiynsha qazaq úkimetine qaiyrylýǵa keńes berdi.
Jýyrda Aq úi ókilderi mobilizatsiiadan qashqan reseilikter AQSh-tan pana surai alady dep málimdegen.
21 qyrkúiekte Resei prezidenti Pýtin elde mobilizatsiia jariialaǵan soń ondaǵan myń reseilik elden qashqan. Reseilikterdiń kóbi qazir Qazaqstan, Grýziia jáne Ortalyq Aziia elderine ketip jatyr. Qazaqstan ishki ister ministrliginiń málimetinshe, 21-26 qyrkúiek aralyǵynda elge 100 myń Resei azamaty kirgen, 65 paiyzy shyǵyp ketken.
Buǵan deiin Baltyq elderi mobilizatsiiadan qashqan reseilikterdi qabyldaýdan bas tartqan. Batys elderi ishinen Germaniia men AQSh soǵysqa barýdan qashqan reseilikterdi qabyldaýǵa daiyn ekenin bildirip, ár adamnyń ótinishi jeke-jeke qaralady dep málimdedi.
Buǵan deiin Qazaqstan biligi "qylmystyq is qozǵalmasa" mobilizatsiiadan qashqan reseilikterdi eline qaitarmaitynyn aitqan.
