Qytai armiiasy taiaý jyldary sońǵy úlgidegi ozyq qarý-jaraqqa ie bolýy múmkin. AQSh áskeri barlaýy bul týraly 15 qańtarda jariialaǵan arnaiy esebinde habarlaǵan. AQSh barlaýy Qytai sońǵy jyldary qorǵanys kúshteriniń áskeri áleýetin kúrt kúsheitý jáne Taivandi Qytaiǵa qosý maqsatynda júrgizip jatqan modernizatsiia nátijesinde zamanaýi qarý-jaraqqa qol jetkizýi múmkin ekenin aitady.
Áskeri barlaý esebinde Pekin Taivandi "syrtqy kúshter" qorǵaýy múmkin dep qaýiptenip, aimaqtaǵy "bóten kúshterdiń" is-áreketin tejeitin júie jasaýǵa májbúr bolyp otyrǵany jazylǵan.
AQSh málimeti boiynsha, Qytaidyń 2018 jyly qorǵanysqa bólgen qarjysy 200 milliard dollardan asyp, 2002 jyldan beri úsh esege kóbeigen. AQSh-tyń jyldyq qorǵanys biýdjeti 700 milliard dollardan asqanymen, onyń kóbi ǵylymi zertteýler men jańa qorǵanys júielerin qurýǵa jumsalady. Al Qytai zertteýge ketetin qarjyny únemdep, satyp alǵan jáne zańsyz jolmen qolǵa túsirgen sheteldik tehnologiianyń kóshirmesin jasaýǵa den qoiyp otyr. Pekin sonymen qatar Qytai naryǵyna kirgisi keletin batys kompaniialaryn kúrdeli tehnologiialardy berýge májbúrleidi.
Amerikalyq barlaý qyzmetiniń málimetinshe, qazir Qytai arsenalynda ushaqtan, kemeler men súńgýir qaiyqtan atylatyn jáne myń shaqyrym qashyqqa usha alatyn, mysaly AQSh-tyń eń úlken áskeri-teńiz bazasy ornalasqan Gýam aralyna jetetin qanatty zymyrandar bar. Buǵan qosa, Qytai ushaq tasityn áskeri kemelerge soqqy beretin ballistikalyq zymyrandardy birinshi bolyp jasaǵan.
AQSh sarapshylary Qytai Taivandy ózine kúshpen qosyp alýǵa áiteýir bir talpynys jasaidy dep sanamaidy. Olardyń boljamynsha, Qytai bul máselede janjal shyǵarýdan tartynady. AQSh qarýly kúshteriniń joǵary shendi qyzmetkeri SNN telearnasyna bergen suhbatynda Pentagonnyń Qytai qorǵanys áleýetin kúsheitse, qytailyq áskerilerdiń óz-ózine degen senimi ulǵaiyp, olar Pekin biligine soǵysta jeńiske jetemiz dep málimdeýi múmkin dep alańdap otyrǵanyn habarlady.
