AQSh barlaý qaýymdastyǵynyń kúlli álemdi dúrliktirgen COVID-19 koronavirýsynyń shyǵý tegine bailanysty pikiri ekige jaryldy, alaida bul virýs biologiialyq qarýǵa jatpaitynyn aitady, dep habarlaidy Azattyq.
Associated Press agenttigi amerikalyq barlaý ázirlegen esepke súienip, Qytai basshylyǵy pandemiia bastalǵanǵa deiin qaterli virýs jaily beihabar bolǵanǵa uqsaidy dep jazady.
Qytaidyń AQSh-pen qoian-qoltyq bailanysta jumys isteýden bas tartýy virýstyń shyqqan tegin taldaý isine qiyndyq keltirgen. AQSh ulttyq barlaýynyń jetekshisi Qytai koronavirýsty ǵalamdyq deńgeide zertteýge kedergi keltirip, ózge eldermen aqparat almaspai otyr dep málimdedi.
Amerika barlaýy esepti ázirleý barysynda odaqtas eldermen keńesip, bul jumysqa úkimettik emes uiymdardyń sarapshylary men mamandaryn tartqan.
AQSh barlaý qaýymdastyǵynyń bir bóligi COVID-19 zerthanadan taraǵan bolýy múmkin dep topshylaidy. Ǵalymdar bolsa, bul virýs tabiǵi jolmen, iaǵni, adamǵa aýrý jabaiy janýardan juqqan degen boljam nanymdyraq deidi.
Jalpy alǵanda, barlaý qaýymdastyǵy COVID-19 koronavirýsynyń shyǵý tegi týraly naqty túsinikteme berý úshin qosymsha aqparat qajet ekenine nazar aýdarady.
AQSh prezidenti Djo Baiden óz málimdemesinde AQSh pen seriktesteri Qytaidy indettiń bastapqy kezeńderin zertteýde birige qimyldaýǵa ári aqparat almasýǵa kóndirý úshin Pekinge qysym jasaýdy jalǵastyra beretinin málimdedi.
"Bul pandemiianyń shyǵý tegi týraly óte mańyzdy aqparat Qytaida bar, degenmen basynan bastap Qytaidaǵy úkimet sheneýnikteri sheteldik zertteý mamandary men Dúniejúzilik densaýlyq saqtaý uiymy músheleriniń ondai aqparǵa qol jetkizýine jol bermeýge tyrysyp baqty" dedi Baiden.
- Mamyr aiynda AQSh prezidenti Djo Baiden eldiń barlaý qyzmetine COVID-19 koronavirýsy qaidan paida bolǵanyn tekserýdi tapsyryp, Qytai zerthanasynyń buǵan qatysy bar-joǵyn anyqtaýǵa úsh ai ýaqyt bergen.
- 2021 jyldyń basynda Qytaidyń Ýhan qalasyna (koronavirýs sol jerden taraǵan) Dúniejúzilik densaýlyq saqtaý uiymy sarapshylary barǵan. Olar zertteý júrgizip, COVID-19 koronavirýsy jabaiy janýardan adamǵa juqqan bolýy múmkin degen boljam shyndyqqa kóbirek keledi degen tujyrym jasaǵan.
- Pekin koronavirýs pen zerthanadan tarap ketkeni jaily shynaiy aqparatty jasyryp otyr degen barlyq aiyptaýdy joqqa shyǵaryp, Dúniejúzilik densaýlyq saqtaý uiymynyń qosymsha zertteýine qatysýdan bas tartqan.
- Pandemiia bastalǵaly beri álemde koronavirýs juqtyrǵan adam sany 215 mln-nan asty, 4,4 mln-nan astam adam kóz jumdy.
