22 aqpan kúni Almatydaǵy Chaplin (Mega Park) kinoteatrynda Qanat Beisekeevtiń «Bala» derekti filminiń tusaýy kesildi. Kartinada AQSh azamattary asyrap alǵan qazaqstandyq balalardyń ómiri baiandalady, dep habarlaidy Ult.kz tilshisi QazAqparat agenttigine silteme jasap.
Jas rejisser Qanat Beisekeevtiń dál osy jobasy jóninde buǵan deiin habarlaǵan bolatynbyz. 40 minýttyq film aǵylshyn tilinde, orys sýbtitrlarymen jaryqqa shyqty. Avtordyń aitýynsha, filmdi túsirýge 5 myń AQSh dollary qajet bolǵan. Kraýdfanding kompaniiasy arqyly xalyq oǵan bul qarajatty 5 kúnde jinap bergen.
«Shyǵarmashylyǵymmen tanys aýditoriiam, kórermenderim meni qoldady. Alǵashqy tólemdi Álisher Elikbaev jasady, osylaisha, áleýmettik jeliniń ózge de qoldanýshylaryna qarajat jiberýine uiytqy boldy. Aýdarymdar 5-500 dollar aralyǵynda jasaldy», - deidi ol.
Film Amerikanyń Virdjiniia, Illinois, Soltústik Karolina, Ońtústik Karolina, Kaliforniia, Missýri, Niý-Iork jáne Pensilvaniia shtattarynda túsirildi. Onda 7 men 21 jas aralyǵyndaǵy 8 keiipkerdiń (Milan Damir Rýopoli, Anelia, Noa Aldanysh Kompton, Gabriella Greis Rid, Nikolas Mandino, Ailim Melodi Ýna Gerig, Serik Rotman, Djordan Rýstem Goldman) ómiri baiandalǵan.
Sondai-aq amerikalyq otbasylar Qazaqstanda bala asyrap alýǵa jariialanǵan moratorii týraly, memleket mundai sheshimge ne úshin kelgendikteri jóninde oi qozǵaidy.
«Qazaqstannan asyrap alynǵan balalardyń Amerikadaǵy ómirin áńgimeleimin. «Amerikalyq mádenietke qalai beiimdeldi, Qazaqstan esterinde qaldy ma, óz Otandaryn qalai elestetedi jáne Qazaqstandaǵy ómiri týraly ne biledi?» degen suraqtar tóńireginde suxbattar órbidi. Olardyń barlyǵy asyrandy ekendikterin biledi, tym erte jastan Amerikaǵa ketkenmen, óz Otany týraly azdaǵan estelikteri de bar», - deidi jas rejisser.
«Filmdi jalǵyz túsirdim. Ózim rejisser, operator, montajdaýshy, redaktor, jýrnalist, prodiýser boldym. Árine, maǵan postprodakshn kezinde jigitter qoldaý jasady», - dep atap ótti avtor.
Qanat Beisekeevtiń sózine qaraǵanda, joba kommertsiialyq emes jáne jas rejisserlerdi shabyttandyrýǵa, az aqshaǵa jaqsy dúnie túsirýge bolatynyn túsindirýge arnalǵan. Osy sebepti «Bala» derekti filmi resmi túrde tusaýy kesilgennen keiin Internet jelisine ornalastyryldy.
