Amerika áskeri óz kúshterin Aýǵanstannan áketip boldy. Bul aqparatty dúisenbi kúni AQSh Qorǵanys ministrligi Ortalyq qolbasshylyǵynyń jetekshisi, general - maior Kennet Makkenzi jariialady.
AQSh azamattyq aviatsiiasynyń federaldy basqarmasy da Kabýldyń Hamid Karzai atyndaǵy halyqaralyq áýejaiy munan bylai áýe qozǵalysyn baqylaityn qyzmetterge qaramaitynyn habarlady. Bul vedomstvo ekipajdardy meilinshe saq bolýǵa shaqyrdy. Tamyz aiynda AQSh áskeri evakýatsiia qaýipsizdigin qamtamasyz etý úshin Kabýl áýejaiyndaǵy ushaq qozǵalystaryna jaýapkershilikti moiyndaryna alǵan edi.
AQSh prezidenti Djo Baiden Aýǵanstanda Batystaǵy odaqtastarymen birge 20 jyl áskeri operatsiia júrgizgen AQSh áskerin 31 tamyzǵa deiin tolyq alyp ketetinin málimdegen bolatyn.
Buǵan deiin BUU Qaýipsizdik keńesi Aýǵanstan biligine kelgen "Taliban" qozǵalysyna úndeý jasap, shetel azamattary men Aýǵanstannan ketkisi keletin aýǵan azamattaryna kedergi keltirmeimiz degen ýádesinde turýǵa shaqyrǵan.
"Bul qujatqa Qaýipsizdik keńesiniń 15 múshesiniń 13-i daýys daýys berip, Qytai men Resei qalys qaldy" dep habarlaidy France-Presse.
Rezoliýtsiiada Frantsiia prezidenti Emmanýel Makron aitqan "qaýipsiz aimaq" týraly sóz bolmaǵan. Buǵan deiin Journal du Dimanche Makronnyń "Parij ben London gýmanitarlyq operatsiialardy jalǵastyrý úshin Kabýl qalasynda BUU baqylaýynda bolatyn qaýipsiz aimaq qurýdy usynady" deitin sózin jariialaǵan.
Ulybritaniia Syrtqy ister ministri Dominik Raab dúisenbide AQSh Memlekettik departamenti uiymdastyrǵan kezdesýde "tálipter basshylyǵyn isine qarai, iaǵni kedergisiz ketýge múmkindik bere me, joq pa degen másele boiynsha baǵalaý kerek" dedi. Raab Kabýldan evakýatsiialaýmen shuǵyldanyp kele jatqan barlyq memleketterdi tálipterden qaýipsizdikti birlese talap etý qajet dep sanaidy.
Memlekettik departament uiymdastyrýymen Kanada, Frantsiia, Germaniia, Italiia, Japoniia, Katar sekildi elderdiń Syrtqy ister ministrleri qatysqan kezdesýde Aýǵanstan máselesine bailanysty ári qarai qandai qadam jasaý qajettigin talqylady.
30 tamyz kúni Pentagon ókili shildeniń sońynan beri Kabýldan ushaq arqyly 122 myń adam áketilgenin habarlady. Onyń kóbi 15 tamyzda tálipter Kabýl men ózge de iri qalalardy alǵannan keiin Aýǵanstannan ketýge májbúr bolǵandar.
