Qazaqstanda aqparattyq qaýipsizdik mamandaryn daiarlaý úshin kiberpoligon qurý josparlanýda. Bul týraly QR Tsifrlyq damý, innovatsiialar jáne aeroǵarysh ónerkásibi vitse-ministri Ashat Orazbek aityp berdi, dep habarlaidy QazAqparat.
Vitse-ministrdiń aitýynsha, 2021-2022 jyldarǵa arnalǵan «Aqparattyq qaýipsizdik» mamandyǵy boiynsha bilim granttarynyń sany 2632-ge deiin artty.
«Buǵan deiin 500 grant, tipti 2017-2028 jyldary 100-ge jýyq grant qana bolatyn. Al qazir Bilim ministrligi stýdentterge osy mamandyqtar boiynsha bilim alý úshin 2632 grant bóledi. 2020-2021 jyldary Aqparattyq qaýipsizdik salasynda 542 maman oqytyldy, tórt maman «Bolashaq» halyqaralyq baǵdarlamasy boiynsha sheteldik jetekshi joǵary oqý oryndarynda taǵylymdamadan ótti», - dedi Ashat Orazbek Parlament Májilisiniń Halyqaralyq ister, qorǵanys jáne qaýipsizdik komitetiniń otyrysynda.
Spikerdiń sózinshe, Tsifrlyq damý, innovatsiialar jáne aeroǵarysh ónerkásibi ministrligi biznes-qaýymdastyqpen birlesip, aqparattyq qaýipsizdik mamandaryn daiarlaý jáne qaita daiarlaý boiynsha kiberpoligon alańyn qurý boiynsha jumys istep jatyr.
«IT salasy óte jyldam damyp keledi, aqparattyq qaýipsizdik te bárin qýyp jetip keledi, sondyqtan adam óz salasynyń naǵyz mamany atanýy úshin JOO bilimi jetkiliksiz jáne qaita daiarlaý qajet. Biz aqparattyq qaýipsizdik salasyndaǵy mamandar kezeń-kezeńimen jańa syn-qaterlerge daiyndyqtan jáne qaita daiarlaýdan óte alatyn alań quramyz», - dedi vitse-ministr.
