Aqmola oblysy Stepnogor qalasyndaǵy Izobilnoe aýylynyń 147 abonenti quiyn jeldiń saldarynan jaryqsyz qaldy. Qolaisyz aýa raiynan eldi mekendegi birneshe úidiń shatyry ushyp ketti, dep habarlaidy "Ult aqparat".
Aqmola oblysy TJD baspasóz qyzmetiniń málimetinshe, 25 shilde kúni Stepnogor qalasyndaǵy Izobilnoe aýylynda saǵat 18:15 shamasynda daýyldy jel soqqany jaily habar kelip túsken.
Daýyl saldarynan elektr baǵanalary, aǵashtar búllingen, sondai-aq turǵyn úilerdiń shatyrlary ushyp ketken.
«Oqiǵa ornyna kelgende eldi mekende 25-30 m/s jyldamdyqpen soqqan jeldiń saldarynan 17 elektr baǵanasynyń búlingeni, bir úidiń shatyry tolyǵymen, al 29 turǵyn úidiń shatyry ishinara ushyp ketkeni anyqtaldy. Sondai-aq aýyl klýby ǵimaratyndaǵy 20 sharshy metr aýmaqtyń shatyry búlingen. Sonymen qatar, daýyl jylý qazandyǵy ǵimaratyndaǵy 100 sharshy metr aýmaqtyń shatyryn ushyryp áketken. Zardap shekkender joq», - dep atap ótti vedomstvo.
Elektr baǵanalarynyń búlinýi saldarynan aýyldyń 147 abonenti jaryqsyz qaldy. Oqiǵa ornynda «Kókshe-energo» JShS-nyń apattyq toby jumys isteýde.
Sondai-aq qutqarýshylar atap ótkendei, Bestóbe kentinde de úsh turǵyn úidiń shatyry zaqymdalǵan.
«Stepnogor qalasynyń ákimdigi eldi mekenderge kelgen shyǵyndy baǵalaý úshin, tabiǵi apattyń saldaryn joiý úshin komissiia qurdy», - dedi oblystyq TJD bastyǵynyń orynbasary Qanat Dospaev.
