Aqmola oblysynda 2 myńnan astam otbasy atýaly áleýmettik kómek alýy úshin tabysyn jasyrǵan, dep habarlaidy "Ult aqparat".
Oblystyq jumyspen qamtýdy jáne áleýmettik baǵdarlamalardy úilestirý basqarmasy baspasóz qyzmetiniń málimetinshe, Aqmola oblysynda ataýly áleýmettik kómek alýshylar sany ótken jylmen salystyrǵanda úsh esege kóbeigen. Naqtyraq aitsaq, ótken jyly 7,2 myń otbasy kómek alsa, biylǵy jyly bul kórsetkish 8,3 myń otbasyna jetken. Iaǵni, qarjy tilimen aitqanda, tólemaqy kólemi 400 millionnan 8,3 milliard teńgege deiin artyp otyr.
Degenmen, kirisin jasyryp ataýly áleýmettik kómek alǵandarda joq emes. Ásirese, 2074 astam otbasynyń ataýly áleýmettik kómek alýy úshin tabystaryn jasyrǵany belgili bolyp otyr.
«Kúni búginge deiin kirisin jasyryp, ataýly áleýmettik kómek alǵan otbasy múshelerine túsinik jumystaryn júrgizgennen keiin biýdjetke 4,9 million teńge erikti túrde qaitarylǵan. Endi sot organdary arqyly 56 ótinim berýshi 14 million teńge qarjyny qaitaratyn bolady. 1500 otbasyǵa ataýly áleýmettik kómek kórsetý toqtatyldy», deidi vedomstvonyń baspasóz hatshysy Vlada Kokorina.
Vedomstvo keltirgen málimetterge súiensek, Qoiandy aýylynyń turǵyny bes bala asyrap otyrǵan Nurjan Tókenqyzynyń da otbasyna ataýly áleýmettik kómek taǵaiyndalǵan eken. Bul otbasyna barlyǵy 1 403 388 teńge tólenýi kerek edi. Alaida, tekseris barysynda, bul otbasynyń maýsym aiynda ózge óńirden kóship kelgeni anyqtaldy. Endi olar maýsym jáne shilde ailarynda tólengen 233 898 teńgeni qaitarýy tiis. Qazirgi tańda bul aqshanyń 100 000 teńgesi ǵana qaitarylǵan.
