Aqmola oblysynyń Qoshqarbaev aýyly mańyndaǵy ziratty sý basyp, marqumdardyń súiegi jer betine shyǵyp jatyr, dep habarlaidy Almaty. tv.
Turǵyndardyń aitýynsha, qansha dabyl qaqqanmen ákimdik esh áreket etpeidi. Al aimaqtyń aq jaǵalylary mazardy qorǵaýǵa qazynadan qarajat tappai jatqandaryn jetkizdi.
Bul zirat elordadan 40 shaqyrym jerde ornalasqan. Nura ózeni arnasynan asyp tasyǵanda sý basyp, marqumdardyń súiegin shaiyp ketip jatyr. Jaqyndary jerlengen zirattyń jaǵdaiyna alańdaǵan jurtshylyqtyń amaly taýsylǵan. "Sý jer betine shyǵaryp tastaǵan súiekterdi qaita kómip otyramyz" deidi.
«Jylda qolǵa ilingenin, kózge kóringenin osy zirattyń janynda, aýyldyń azamattary imammen, ákimshilikpen birge kelip, súiekterdi jinap duǵasyn oqyp, qaitadan zirattyń buryshyna kómip jatyr. Júregimizdi aýyrtady», – dedi Qoshqarbaev aýylynyń turǵyny Seiit Ibraev.
Másele 5 jyl buryn bastalǵan. Ózen arnasynyń ózgerýine elordadaǵy qurylys kompaniialarynyń zańsyz áreketteri sebep bolypty. Olar qarajat únemdeý maqsatynda tegin tas pen topyraq alyp, sońy osyndai problemaǵa ákep soqqanyn aitady. Al ózen sýyn turǵyndar qajettilikterine de qoldanady eken.
«Sol sýdy biz ogorodqa qoldanamyz. Balalar shomylady. Jaz boiy sol kópirdiń janynda qaladan, basqa jerlerden demalýǵa keletin adamdar bar. Sol sýdyń astynda balyqqa qaraǵanda adamnyń súiegi kóp. Ol talai dáleldengen», – dedi Qoshqarbaev aýylynyń turǵyny Seiit Ibraev.
Másele jóninde oblys, aýdan basshylary habardar. Turǵyndardyń aitýynsha, jobalyq-smetalyq qujattary ázirlegenderin de jetkizgen. Biýdjetten qarajat bólingen boida Nura ózeniniń arnasyn ózgertýdi josparlaǵan. Ákimdik ókilderi bolsa, turǵyndardyń sózin rastap, osydan 3 jyl buryn jumys toby qurylǵanyn, qarajat bóliný qarastyrǵanyn aitady.
«2019-2020 jyldarǵa oblystan qarajat qarastyrylmaǵan, sózdiń ashyǵy. Biz aýdannan jiberdik, biraq oblystan toqtap qaldy. Búgingi tańda jobalyq-smetalyq qujatty jasaý úshin esepteý jumysyna biýdjetke tapsyrys jasaldy. Esepteý jumysy bitkennen keiin jobalyq-smetalyq qujaqa qarajat qarastyratyn shyǵarmyz», – dedi Tselinograd aýdany Turǵyn úi inspektsiiasy jáne kommýnaldyq sharýashylyq bóliminiń basshysy Mels Jumabaev.
Aýdandyq ákimdik jyl saiyn jobalyq-smetalyq qujattar jasaýǵa qarajat shyǵyndap álek bolyp jatqanda, 50 jyldan asqan qorymnyń búginde úshten bir bóligi qalǵan. Eń soraqysy jurtshylyq munyń sońy ekologiialyq máselege ákelip, aýyl turǵyndary arasynda aýrý tarap ketý qaýpi bar dep alańdaidy.
