Aqmola oblysynda iz-túzsiz joǵalǵan 32 jastaǵy áielge izdeý jariialandy, dep habarlaidy QazAqparat oblystyq politsiia departamenti baspasóz qyzmetine silteme jasap.
Vedomstvonyń málimetinshe, biylǵy jylǵy 27 qazan keshki saǵat 19:49-da Birjan sal aýdanynyń PB kezekshi bólimine Úlgi aýylynyń 35 jastaǵy turǵyny habarlasyp, 1989 jyly týǵan áieli Dinara Jeńisqyzy Rahimovany izdep tabýǵa kómek suraǵan.
Er adamnyń sózinshe, áieli 27 qazan kúni saǵat 16:20 úiinen shyǵyp ketken, sodan beri habarsyz.
«Bul jaǵdai sotqa deiingi tergeýdiń biryńǵai tiziliminde tirkeldi. Izdestirý jumysyna Birjan sal jáne Býrabai aýdandaryndaǵy politsiia bólimderiniń jeke quramy, jurtshylyq jáne olarǵa berilgen kúsh jumyldyryldy. Politseiler sarai ǵimaratyn, sharýashylyq qurylystaryn, qaraýsyz qalǵan ǵimarattar men qurylystardy súzip shyqty. Beinebaqylaý kamerasynyń jazbalaryn zerttei kele, D.Rahimova saǵat 16:20 shamasynda «Stepniak-Shýche» avtojolyna shyǵyp, jol boiymen Shýche qalasyna qarai bet alǵany anyqtaldy. Qazirgi ýaqytta joǵalǵan adamnyń júrgen jerin anyqtaý úshin jedel-izdestirý sharalary júrip jatyr», - dedi vedomstvodan.
Joǵalǵan adamnyń belgileri: boiy 165-170 sm, dene bitimi myǵym, shashynyń uzyndyǵy ortasha, qara tústi, kózderi qara, tik muryndy, erni juqalaý kelgen, qulaqtary jabysqan.
Ústine aq túimeleri bar kók tústi kúrteshe, sur tústi áielder qalpaqshasy, «R» árpi jáne aq jolaǵy bar qara tústi riýkzak, aq tabany bar qara tústi sporttyq kebis, qara tústi triko kigen.
Dinara Rahimovany kórgen adamdar bolsa, dereý 8(716-39) 2-10-02, 2-17-38, 2-15-33 nemese «102» telefondary arqyly habarlasýǵa bolady.
